Barbón “aboga” por “garantizar” l’asturianu en “tolos ámbetos de la vida social”, un drechu que se supón que ya teníemos de magar 1998 y que yera’l so deber facer cumplir dende qu’entró de presidente
El Conseyu de la Rede de Normalización Llingüística vien de roblar en Bimenes -nel so primer aconceyamientu no que va de llexisllatura- una declaración istitucional en defensa del asturianu. La ocasión foi aprofitada pa presentar el “Manual de llinguaxe alministrativu en llingua asturiana”, una guía sobre’l so usu ante l’Alministración que vien a facer recomendaciones pa qu’entame a cumplise con unos drechos recoyíos va más d’un cuartu sieglu na Llei 1/98 de 23 de marzu, d’Usu y Promoción del Bable/Asturianu.
Barbón declaró nesta ocasión qu’actuaciones concretes “Son fundamentales pa la superviviencia del asturianu, una llingua que, comu otres minoritaries, precisa d’actuaciones específiques pa garantizar la so presencia en tolos ámbetos de la vida social”. Ye de suponer que n’adelante sentiremos al presidente l’executivu falar con normalidá l’asturianu pente’l que xorreció, entamará a escribir les sos comunicaciones oficiales y tuiters n’asturianu y, sobretou, entamará -esta vegada en serio- el procesu pa oficializar la llingua. Porque persabe que los asturianos tamos fartucos de declaraciones, guies y semeyes y que lo que necesitamos ye, a cencielles, la oficialidá.
O igual non. Igual sigue riéndose de los asturfalantes y esti yera otru brinde al aire, valeru de conteníos, col qu’Adrián se quier colgar comu una medaya el fechu de dar un pasín en direición a facer cumplir una llei que’n teoría lleva 26 años cumpliéndose. Aceutense apuestes.
Nel Dos Santos
This work is licensed under a Creative Commons Attribution 4.0 International License.
