La desigualdá ente la remuneración que perciben homes y muyeres algama’l 78% cuando se trata de pensiones de xubilación contributiva

Comu media, un asturianu gana 6.591 euros más al añu qu’una asturiana. Los caberos datos recoyíos apunten a que sedría preciso subir el salariu de les muyeres hasta un 30% pa igualalu al de los homes, una fienda qu’alluga a Asturies nel pior puestu de la llista d’ente tolos territorios del estáu. 

Non solo cobren menos, sinón que yos cuesta más alcontrar trabayu; el paru femenín ye dos puntos superior al masculín, la tasa d’actividá femenina, del 47,67% ta lloñe d’algamar la masculina, 53,97%. Les muyeres ocupen puestos de menor nivel y los sectores con condiciones más precaries tienen más pesu d’emplegu femenín.  El 21% de les asturianes trabaya a tiempu parcial, frente a namás el 6,9% de los homes. Incluso nel cobru de les prestaciones de desemplegu les muyeres perciben un 10,7%. Pero onde la fienda resulta vraeramente xabaz ye pente les pensionistes, con ingresos un 78% menores a los homes nes mesmes circustancies. 

Parte d’esta desigualdá deriva de les dificultaes estra que les muyeres tienen y tuvieron pa conseguir y caltener un bon trabayu. Pesi a tola llucha desendolcada nesi sen, ye un fechu que los curiaos a dependientes y les xeres d’atención a la reciella continúen recayendo principalmente nes muyeres, complicando ya interrumpiendo la so carrera llaboral, cuestión que amás ye utilizada como argumentu polos encargaos de recursos humanos pa priorizar la contratación y promoción de homes perriba de les sos compañeres. 

Susana Sela

This work is licensed under a Creative Commons Attribution 4.0 International License.