La fauturación del sector hoteleru en conceutu d’agospiu en xineru foi de 1,2 millones d’euros, la cifra más alta de la serie hestórica. Les altes cifres de visitantes impliquen una presión estra sobre los servicios públicos xixoneses, lo que xustifica y fae recomendable la instauración d’una tasa turística que repercuta nel conxuntu la ciudadanía de Xixón.

Los datos espublizaos güei pol Institutu Nacional d’Estadística amuesen que la cifra total de turistes agospiaos n’establecimientos hoteleros de Xixón nel mes de xineru asitióse en 18.063, con una estancia media de 1,9 nueches. Esto traduzse nun total de 35.220  nueches d’hotel.

El númberu de viaxeros agospiaos nos hoteles de la ciudá aumenta un +39,1% respeuto a xineru del añu pasáu, nun mes consideráu como temporada baxa.

Tocántenes a la procedencia d’estos viaxeros, el 16,4% reside en Madrid, el 15,4% en Galicia y el 14,0% en Castiella y Llión. Los estranxeros representen el 11,2% de los turistes agospiaos nos hoteles de la ciudá. Respeuto al añu caberu, ye de sorrayar l’incrementu observáu nel númberu de turistes procedentes de Madrid (un +35,9% más qu’en xineru de 2023), Galicia (+64,4%) y Castiella y Llión (+50,2%).

En cuanto a la tarifa media diaria (ADR), esta afítase en 56,00 euros. Ye un +6,5% mayor que l’añu pasáu y la más elevada de la serie hestórica. El RevPAR (ingresos por habitación disponible) ye de 17,29 euros, un +8,9% respeuto a xineru de 2023.

Esti nivel de precios y rentabilidá permite estimar en 1,2 millones d’euros la fauturación del sector hoteleru en conceutu d’agospiu. Poro, medra un +15,6% respeuto a xineru del añu pasáu y ye la cifra más alta de la serie hestórica.

Alberto Rodríguez

This work is licensed under a Creative Commons Attribution 4.0 International License.