La Conseyería de Transición Ecolóxica, Industria y Desendolcu Económicu autorizó una vegada más a Industries Lláctees Asturianes, S.A a vertir directamente les sos borrafes al ríu Navia por un períodu máximu de 23 díes, de magar el 8 d’abril de 2024 por cuenta de la revisión del emisariu d’Ence.
El Principáu autoriza estos arramaos ensin dalu estudiu ambiental ya ensin escuchar les quexes de la Coordinadora Ecoloxista d’Asturies -que lleva décades denunciando los munchos arramaos na cuenca del ríu-.
Dende 2011 la empresa lláctea ta virtiendo nel emisariu d’Ence, gracies a lo que dexaron de vese’n ríu los avezaos episodios de contaminación de décades anteriores. Sicasí, la empresa sigue virtiendo gran cantidá de materia orgánico y grases, col consiguiente impactu nel mediu y qu’acaben na mar ensin control, ensin que se sepa si la mar tien capacidá abondo pa tratar tanta contaminación.
Los arramaos d’esti emisariu submarín nun son homoxéneos, tán compuestos por una variedá de partícules con distintes densidaes y nun s’eslien de manera uniforme, teniendo un notable impactu na so redolada y pudiendo llegar a tener impactos sobro la salú pública.
Estos efectos entá son más importantes en zones de pesca, marisquéu, bañu, tamién pueden producise efectos estéticos, por formación de capes de grases y floración d’ocles. Ensin escaecer tolos efectos sobro la cadena trófica debíos a los contaminantes arramaos (nutrientes, materia orgánico, metales, compuestos orgánicos, sólidos etc.) .
La cuenca del Navia ye’l paraísu de los arramaos, en cuantes que les industries vierten materiales contaminantes ensin nengún control, vía emisariu, a la mar y la situación, denuncien dende la CEA, nun ameyoró res nestos años pesi a que los procesos de depuración pueden faese más y meyor.
Alberto Rodríguez
This work is licensed under a Creative Commons Attribution 4.0 International License.
