La Comisión Permanente del Conseyu de Patrimonio Cultura de la Conseyería de Cultura del Principáu d’Asturies riquió al Conceyu de Ribesella a que suspenda baltar de los árboles de la plaza de la Talaya, polo menos hasta cuntar col informe favorable d’esta Conseyería.

La Coordinadora Ecoloxista comunicara al Principado la menacia de baltar estos árboles allugaos na plaza de La Talaya, tamién conocida como la Plaza del Mercáu de Ganáu, que s’asitia en colindancia col Conxuntu Históricu-artísticu del cascu antiguu de la villa de Ribesella, incluyida na Área de Rehabilitación Integral y arrodiada de diversos inmuebles incluyíos nel Inventariu del Patrimoniu Cultural d’Asturies. Trátase de diez árboles centenarios que fueron siempres imaxe y hestoria d’esti rincón de la villa. Los árboles tienen mientres tol añu frondosas fueyes verdes que dan solombra al parque infantil allugáu dientro d’esti espaciu y que se poden tolos años puntualmente, fradadures que posiblemente seyan les responsables en parte del so estáu, ensin escaecer que tol sistema radicular d’estos árboles esta llindáu poles obres del parque y de la zona, lo qu’estropió la so vida, comu apunten dende la CEA.

Tamién reclamaron al Conceyu que na plaza que’n llugar de baltalos toos, se llimitaren a la reposición y saneamientu de los árboles enfermos.

Consideren importante recordar qu’un árbol da’l so máximu potencial y rendimientu en descontaminación de magar los sos 15 o 20 años, y que lo fai al traviés de les sos fueyes, non del tueru. “Nos últimos años venimos superando los 30 graos pel branu, inclusive na seronda, polo que precisamos la solombra y la refrigeración qu’apurren los árboles nun llugar tan singular de Ribesella para los sos vecinos y los sos visitantes”.

Nel Dos Santos

This work is licensed under a Creative Commons Attribution 4.0 International License.