L’Institutu Internacional de Drechu y Mediu Ambiente (IIDMA) considera que l’Alministración asturiana tuvo d’adoptar midíes apropiaes pa la protección del ríu Nalón cuando se produxó’l cambéu y actualización de l’autorización ambiental integrada otorgada a la empresa EDP pal furrulamientu d’esta central térmica en 2015
El Tribunal Supremu (TS) envaloró un recursu de casación interpuestu pol Institutu Internacional de Drechu y Mediu Ambiente (IIDMA) contra la Sentencia de la Sala de lo Contencioso-Alministrativu del Tribunal Cimeru de Xusticia (TSX) del Principáu d’Asturies. La sentencia recurrida foi dictada de resultes de la impugnación por IIDMA de la resolución de la Consejería de Fomentu, Ordenación del Territoriu y Mediu Ambiente de fecha 16 de xunetu de 2015, pola que s’alcordó modificar la autorización ambiental integrada otorgada a la empresa EDP España pa la Central Térmica de carbón de Sotu de Ribera (Asturies).
La sentencia del TS falla a favor de IIDMA nesti particular del so recursu de casación al envalorar que yera esixente nel casu enxuiciáu que la resolución de 16 de xunetu de 2015 considerara, dende’l prisma del principiu de precaución, y adoptara, si esi mesmu principiu lo hacía aconseyable, mayores midíes de protección na Zona d’Especial Caltenimientu (ZEC) de la Rede Natura 2000 “Río Nalón” en relación col cambéu y actualización de la citada autorización, que permitía l’arramáu d’agües residuales a una elevada temperatura (28ºC) nesi espaciu protexíu. Acordies con IIDMA, les condiciones del arramáu de les agües residuales previstes na autorización representaben una fonte d’alteración de la población salmonícola (salmon salar) presente nel tramu del ríu designáu como ZEC, motivando la migración del salmón a otros calces más fríos tal que reportaben fontes d’información científica españoles.
En referencia a lo anterior, cítase’l Decretu 125/2014, de 17 d’avientu, pol que se declara la Zona Especial de Conservación Río Nalón (ZEC) y apruébase el so I Preséu de Xestión, vixente nel momentu que dictóse’l resolvimientu impugnáu de 16 de xunetu de 2015. Esti Decretu 125/2014 reconoz que l’alministración y xestión d’esta ZEC correspuende a la Conseyería con competencies en materia d’espacios protexíos y que, porto, cuando les actuaciones que pretendan realizase na zona oxetu de protección tengan de sometese a autorización per parte de l’Alministración (estatal, autonómica o llocal) va ser esta la que conceda l’autorización teniendo d’afaese a les condiciones previstes nel Preséu de xestión de la ZEC. El TS, faciéndose ecu de los allegamientos presentaos por IIDMA, cita l’anexu V del mesmu Decretu, referíu a la Valoración y Estáu de Conservación de Habeŕbitats y Especies Red Natura presentes na ZEC Ríu Nalón, qu’afirma que l’estáu de conservación de la especie d’interés comuñal “salmón salar” ye “amenorgáu”; que los usos necesarios pa la conservación riquieren “aplicar midíes de xestión” y que éstes son “necesaries”.
“Magar esta sentencia del TS dictóse nun momentu en que EDP anunció la so intención de cerrar la central de Sotu de Ribera, esti pronunciamientu del Supremu implica una obligación pa cualquier alministración de respetar el principiu de precuru a la de decidir sobro l’autorización d’una actividá que puede suponer un deterioru d’habitats naturales y d’especies y, nesi casu, adoptar midíes apropiaes. Poro, tamos bien satisfechos con esti concretu pronunciamientu a favor de les nueses tesis”, declara Ana Barreira, Directora y Abogada Senior del Institutu Internacional de Drechu y Mediu Ambiente (IIDMA).
Susana Sela
This work is licensed under a Creative Commons Attribution 4.0 International License.
