Na resolución negativa del Ayuntamientu Xixón pal usu del Muséu del Pueblu d’Asturies pa la PSLA ensiquiera nun se menciona que seya “un eventu multitudinariu y esa arribación supón un riesgu pal caltenimientu del espaciu museísticu”
De magar el conflictu entamáu pol director del Muséu del Pueblu d’Asturies, Xuacu López, la Conceyala d’IU Noelia Ordieres rializó una riestra d’ entrugues al consistoriu. Nelles, pide desplicaciones sobre la denegación del permisu pa la cellebración de la Primer Sidre l’Añu nel Pueblu d´Asturies, poniendo en duda la validez xurídica d’aplicar la llei a la qu’apelen y denunciando’l perxuiciu que supondría poner fin al usu d’esi espaciu pa eventos sociales y culturales de la ciudá. “Supondría el fin d’eventos tan importantes comu la propia Primer Sidre l´Añu, el Día de la Reciella, los encuentros de les vocalías de la muyer o la propia inauguración de la Feria de Muestres” declara, polo que solicita l’acesu al espediente pa conocer los detalles, instando a la Conceyala de Cultura, Montserrat López Moro, a desplicar los motivos de la denegación del permisu, recordando-y que “la cultura de la manzana y la sidre ta en procesu de ser declarada Patrimoniu Cultural Inmaterial pola Unesco, declaración apoyada pol propiu Ayuntamientu de Xixón y esti eventu dase nel museu etnográficu que tien como oxetu la recuperación y conservación de les tradiciones asturianes, ente otres la de la sidre“.
La rempuesta de Monserrat López aportó via prensa, con declaraciones nes qu’afirma que “un eventu multitudinariu y esa arribación supón un riesgu pal caltenimientu del espaciu museísticu”, cuestión que, declaren dende la Fundación Asturies XXI, entamadores del eventu, non solo nun ye cierto, sinón qu’enxamás foi l’argumentu oficial pa la prohibición, como pue comprobase nel resolvimientu del Conceyu de Xixón-
L’únicu motivu acotáu para torgar siguir celebrando la Primer Sidre L’Añu nel Muséu del Pueblu d’Asturies foi una llei de 2015 que prohibe la vienta, suministru, publicidá o consumu de bébores alcohóliques en centros de les alministraciones públiques”, escaeciendo que nun pue aplicase a la Primer Sidre L’añu, porque la cultura asturiana de la sidre ta declarada Bien d’Interés Cultural pol ‘Principáu’ y ye candidata oficial a ser reconocía pola UNESCO como Padremuñu Inmaterial de la Humanidá
De fechu, la Fundación Asturies XXI yá plantegara de motu proprio amenorgar l’aforu a una tercer parte de los asistentes del añu pasáu, para evitar una posible “sobrecarga”, y favorecer la presencia de families nel eventu. Nel mesmu sentíu, dende la Fundación Asturies XXI, entidá organizadora del eventu, informen que los únicos daños carecios pol Muséu del Pueblu d’Asturies en 13 años de cellebración de la Primer Sidre L’Añu son: el reposabrazos d’un bancu, una portiella y el dispensador de papel d’un bañu, daños que fueron pagáos dafechu pola organización. Asina mesmu, nos 13 años de celebración de la Primer Sidre l’Añu nunca nun se reseñó denguna incidencia d’orde públicu, nun siendo necesariu riquir atención sanitario nin policial, polo que la esmolición pola integridá del muséu o por posibles incidentes resulta inxustificada dafechu.
Nel Dos Santos
This work is licensed under a Creative Commons Attribution 4.0 International License.
