Alborecemos col cielu cubiertu y precipitaciones na fastera ocidental con unes temperatures que tan alrodiu de los 9ºC, rexistrándose nel puirtu Payares 0,9ºC.

Güei la entrada d’un frente fríu mui activu, durante estes primeres hores, va dexanos precipitaciones abondoses ya persistentes que fadrán baxar les temperatures de sópitu, pudiendo surdir la nieve perriba de los 400m ya inclusu dalgo menos nos valles del interior y ye que la configuración del frente ye un poco especial, vien con cumulonimbos que son les ñubes de tormenta con convección profunda con xeopotenciales mui baxos y vientu terral qu’impide que temple’l mar les mases d’aire. Una vegada que pase’l frente, a partir del mediudía más o menos, dirán entrando xarabatos de forma intermitente pero esta vegada dende’l mar, polo que subirá dalgo la cota de nieve a pesar de que mos entre más aire fríu n’altor. Vendrán acompangaos de truena y xarazu nel llitoral y seguirá nevando copiosamente na cordelera.

Esta situación va estendese hasta l’alborada del domingu con una cota de nieve que rondará los 500m cola posibilidá de que baxe dalgo más según la intensidá y persistencia de los xarabatos.

L’aire sedrá de componente noroeste sele en xeneral con dalguna racha moderada en zones altes ya en puntos del llitoral.

El domingu pali que pali dirá meyorando con xarabatos entovía pela mañana pero dirán perdiendo fuerza ya frecuencia, remitiendo percompletu pela tarde cuando van abrise grandes claros o abancios. Les temperatures van caltenese baxes y la cota de nieve tará a primeres hores pelos 500m, pa subir hasta los 900m pela tarde.

El llunes un pequeñu frente mos cruzará, apurriéndonos precipitaciones al mediudía que sedrán de nieve perriba de los 1300m, baxando dalgo más al finar pero sin malpenes precipitaciones. De tarde abriránse grandes claros o abancios y de nueche xelará en munches zones del interior asturianu.

El martes va tar poco nuboso en xeneral con temperatures fríes a pesar de la llume del sol, volviendo a xelar de nuevu durante’l riscar del miércoles. Los siguientes díes tendremos dalgo más de nubosidá, sobre too pela cordelera y fastera surocidental onde puen tener nevaes de componente sur pero esto yá lu diremos viendo.

Que paséis un bon fin de selmana collacies ya collacios.

This work is licensed under a Creative Commons Attribution 4.0 International License.