34 creadores de conteníos de viaxes visiten esta selmana Xixón Xixón nuna aición de promoción entamada por Visita Xixón cola collaboración de Renfe y que va poder siguise en redes al traviés del hashtag #GijónMásCercaQueNunca, #XixónMásCercaQueNunca
El miércoles viniente, 6 de marzu, el tren Alvia que sal de la estación de Chamartín, en Madrid, a les 10:27 h con destín Xixón va marcar un fitu na promoción de la ciudá asturiana como destín turísticu y de la llinia nueva d’alta velocidá. Nún de los sos vagones, van viaxar 34 creadores de conteníos especializaos en viaxes pa pasar pela primer vegada pela variante de Payares y esperimentar de primera mano una escapada a la única ciudá del Cantábricu a la que se pue aportar en tren d’alta velocidá.
Ye una aición promocional entamada por Visita Xixón y cunta cola collaboración de Renfe, cola que la entidá municipal robló un alcuerdu de collaboración na edición cabera de FITUR. “Tamos ciertos de qu’esta acción, posible gracies al acuerdu con Renfe, tendrá gran repercusión y ampliará la presencia de Xixón n’Interné redes sociales”, afirmó la vicealcaldesa de Xixón y conceyala d’Economía, Emplegu, Turismu y Anovación, Ángela Pumariega.
A lo llargo’l percorríu, los creadores de conteníu, qu’acumulen más de 500.000 siguidores nes sos redes, van tener dalguna sorpresa que va faceyos más prestosu’l viaxe. En llegando a Xixón, aguárda-yos un programa de visites y actividaes que van dir compartiendo nes sos plataformes al traviés de vídeos y semeyes col hashtag #GijónMásCercaQueNunca, #XixónMásCercaQueNunca. Van visitar el Muséu del Ferrocarril d’Asturies, onde escubrirán la hestoria industrial de la ciudá, y van desplazase al Llagar Trabanco. Ellí van conocer, al traviés de delles actividaes, la cultura sidrera asturiana y van esfrutar d’una espicha tradicional.
El segundu día, xueves 7 de marzu, los y les creadores de conteníu van esfrutar de tiempo llibre pela mañana pa dar un paséu pel centru o per Cimavilla y pa qu’empleguen la Visit Gijón Card o los bonos de Xixón Llambión, que Visita Xixón les va proporcionar. Tamién van conocer el proyeutu “De compres per Xixón”, que plantega delles rutes pelos comercios más emblemáticos y sostenibles de la ciudá.
A última hora de la mañana, los y les influencers van aportar a Llaboral Ciudá de la Cultura pa realizar una visita guiada y, darréu, esfrutar d’una xinta de despidida en Llaboral Centru d’Arte y Creación Industrial, onde-yos aguarda una esperiencia sorpresa pa conocer meyor la gastronomía asturiana.
La visita va finar cola vuelta a Madrid y Llión na recién inaugurada llinia d’alta velocidá, nel tren que sal de la estación xixonesa a les 19:27h, y coles redes enllenes d’imáxenes y propuestes nueves pa esfrutar de Xixón.
Alberto Rodríguez
This work is licensed under a Creative Commons Attribution 4.0 International License.
