Unos pocos datos oxetivos rescamplen cual ye’l llugar que les asturianes ocupamos nel mercáu llaboral: más paru, más temporalidá, más trabayos a tiempu parcial y sueldos más baxos, ensin escaecer los llabores de curiáu de dependientes, que siguen recayendo mui mayoritariamente nes muyeres
En 2023 la población activa asturiana cifrábase en 449.000 persones, de les que’l 49,5% (222.100) yeren muyeres; d’elles, 47,67%, participaben nel mercáu llaboral, pero careciendo condiciones bien piores que los sos compañeros.
Pa entamar, el paru ye mayor pente les muyeres, el 13,1% frente al 11,2%, acordes los datos medios de la GUO, anque la mesma encuesta recueye tamién que son les muyeres les que más viviegamente busquen emplegu.
Una bones que lu topen, el 21% de los casos ye a tiempu parcial, una opción que mientres ye coyuntural pa los homes (polo xeneral mientres tan nos primeros años de la so vida llaboral) ye estructural pa munches muyeres. El 74% de la población ocupada a tiempu parcial ye femenín.
Tamién la temporalidá afeuta más a les muyeres, en 2023 el 24,0% de les asalariaes asturianes tenía un contratu temporal, frente al 14,4% de los homes. Como datu llamativu, nun sector teóricamente tan igualitariu comu’l públicu, el 48,3% de les asturianes que trabayen nelli faenlo con contratu temporal, frente al 7,8% de los homes.
Un de los factores desplicativos de la elevada temporalidá y de los contratos a tiempu parcial ye la mayor participación femenina en sectores de baxa calidá llaboral, como la hostelería, llimpieza o curiaos, trabayos que pa enriba tienen piores salarios.
A resultes de toes estes diferencies, según los últimos datos disponibles de l’Axencia Tributaria el 39% de les asturianes tuvo al cabu del añu unos ingresos salariales inferiores o iguales al Salariu Mínimu Interprofesional (SMI).
Nun podemos escaecer qu’a eses piores condiciones llaborales y, sobre tou, salariales, xúntase’l fechu que por muncho que se diga, los curiaos siguen tando fuertemente feminizaos, torgando en munchos casos l’accesu al trabayu y complicando’l so desendolcu n’otros. Los datos recoyíos nel añu 2023 revelen que, n’Asturies, 634 muyeres recurrieron a escedencies por curiáu de la reciella, frente a 93 homes, ello ye, que’l 87% de les escedencies por curiáu de menores correspuenden a muyeres.
Por tou ello, pesi a lo muncho avanzao, queda muncho camín qu’andar anantes de que podamos falar d’igualdá ensin faltar a la verdá.
Susana Sela
This work is licensed under a Creative Commons Attribution 4.0 International License.
