Mentantu per Mieres discurría’l manifestamientu convocáu por aquellos que nun ponen solución a los problemes de les muyeres asturianes, les que lluchen día ente día polos sos drechos desfilaron por miles en Xixón baxo’l llema “Por un feminismu llibre y combativu”
Trabayadores del SAD, estudiantes, represaliaes de La Suiza, sindicalistes de la RCT, el Colectivu de Trabayadores, Llibres y Combatives, la Izquierda Revolucionaria… les muyeres que nun se rinden, les que dan la cara, les cabezaleres del movimientu obreru, estudiantil, sindical, feminista, salieron a la cai esti 8M per Xixón, con un manifestamientu qu’ocupó les cais de la Plaza Toros al Humedal con miles de persones que xunieron la llucha obrera cola feminista, porque la revolución, dixeron, sedrá feminista o nun sedrá. Por que’l feminismu, sedrá de clas o nun sedrá. Porque lo uno ensin lo otro, tienen claro, queda coxo.
Nes intervenciones de darréu’l manifestamientu destacó, pola manera’n que resume la situación de la muyer trabayadora asturiana, la intervención del coleutivu les 6 de La Suiza, un casu que xune violencia sesual, acosu llaboral, silenciamientu de la víctima, complicidá xudicial col acosador, represión sindical, persecución y castigu pola autodefensa.
Tamién en Xixón y Uviéu la mesma mañana del 8M manifestáronse los escolinos del Sindicatu d’ Estudiantes y Llibres y Combatives una fuelga estudiantil feminista, qu’inclúi una movilización al meudía en Xixón y Uviéu. El llema emplegáu ye ‘¡Siguen violándomos y matándomos!’.
Nel Dos Santos
This work is licensed under a Creative Commons Attribution 4.0 International License.
