La puesta n’escena cola que se recibió en tren a los influencers allegaos pa conocer Xixón y publicitala nes sos redes “d’una manera acordies a los tiempos” consistió nunes muyeres vistíes “de pueblerina” (que non de pueblu)  faciendo’l papel de paletes

Munchos de los influencers y usuarios de redes asturianos consideraron inapropiada la imaxen que se dió de les asturianes, en xeneral, y de les xixoneses, en particular, na performance realizada en tren pa los influencers de viaxes que veníen a Xixón dientro’l programa entamáu pola Casa Conceyu y Visita Xixón pa dar visibilidá a la ciudá.

La representación consistió en dos muyeres vestíes asonsañando lo qu’ellos entienden por ser”de pueblu”, y con ello nun queremos decir col traxe’l país, lo que tendría’l so xacíu, sinón con sayes llargues, toquilla, pañoleta y mandil, un cestu en brazu, recibiendo a los señoritos de la capital falando amestao perronero y cutres asonsaños d’inglés y francés macarrónicos (“ye que nos gusta en coloniano”), porque ya lo sabemos, Xixón ye un pueblu y les muyeres asturianes son incultes, atrasaes, visten como les güeles del sieglu pasáu y nun saben falar dengún idioma concretu. 

La idega de trayer y convidar a los influencers “de la capital”, pa tratar d’impresionalos y roga-yos qu’escriban sobre nosotros baxo’l hastag #GijónMásCercaQueNunca (ya de por si llargu y abegosu d’usar) tien ya tintes de provincianismu, especialmente si pensamos que ñaz cola idega de “cellebrar que Madrid ta más cerca”.

Pa continuar na llinia de destacar a Xixón comu ciudá adaptá a los tiempos, na estación de Xixón recibiéronlos con un balle al ritmu d’ABBA, grupu asturianu modernu y actual onde lu haiga.

📲 Amenizando el viaje de l@s creador@s de contenido en el tren de @Renfe rumbo a #Gijón #Xixón con la campaña promocional #GijónMásCercaQueNunca pic.twitter.com/0nAmdOZMF7

— Visita Gijón – Profesional (@GijonTurisProf) March 6, 2024

Nel Dos Santos

This work is licensed under a Creative Commons Attribution 4.0 International License.