El comité d’empresa de los trabayadores del Hospital de Xove, en Xixón, vien d’anunciar que va entamar protestes y movilizaciones de magar el día 20 de marzu, fecha na que van concentrase  énte la entrada principal del centru sanitariu.

Los trabayadores de Xove, Hospital de capital priváu concertáu pa ufrir servicios públicos, denuncien el déficit de plantiya, con un ratiu de menos de 3 profesionales per cama, que ta entá peor que los 4’5 de la públic. Amás, siguen ensin la reconocencia de la carrera, entá realizando les mesmes funciones que’l restu de los trabayadores de la rede pública, lo que-yos dexa en clara desventaxa respecto al restu d’hospitales.

La so mayor reclamación consiste na homologación de salarios colos trabayadores del Sespa. Danse diferencies de remuneraciones ente profesionales de les mesmes categoríes d’alrodiu’l 8% del salariu base en comparanza con el trabayadores del Sespa, y tres la última actualización de complementos de la pública les diferencies agrávense entá ye más, esistiendo hasta 800 euros añales de perda solo pol conceutu de turnicidá. Consideren que la diferencia nes retribuciones afecten a los trabayadores ya, indirectamente, a los pacientes.

Esta ye una amuesa más de los efectos secundarios de les privatizaciones de servicios públicos que tanto gusten al executivu asturianu. Baxada de la calidá del serviciu y precarización de los trabayadores.

Susana Sela