L’anteproyeutu de ‘Llei pola que se regula la Rede Autonómica d’Escueles Infantiles’, pa la etapa de 0 a 3 años nun contempla la llingua materna nin la diversidá llingüística

Nes escueles de cero a tres años van atendese neños y neñes n’edá mui temprana y Andecha Astur ve un perxuiciu, tanto pa la so adautación ya integración nel ambiente educativu comu pa la pervivencia de la llingua asturiana l’ausencia de la mesma na llei que trata d’aprebase, polo que vienen d’apurrir a la Conseyería d’Educación les sos allegaciones a la mesma, nes que reclamen que se recueya específicamente nesta llei l’atención a la diversidá llingüística ya’l respetu a la diversidá llingüística y que, si nun ye la llingua vehícular cola que se fala a los rapacinos, polo menos s’incluya la llingua asturiana dientro’l currículum educativu nesta étapa.

Nes sos allegaciones aporfien en que non solo l’adaptación escolar ye más fácil, sinón que’l deprendizaxe de la llectoescritura, asina comu de la propia espresión verbal, ye más eficiente pedagóxicamente falando si se fae na propia llingua materna, polo que si se fala a los rapacinos n’español dafechu ta perxudicándose a aquellos de families asturianes.

Pela otra man, la introducción forciada d’otru idioma n’edaes tan tempranes va dañar irremediablemente la tresmisión oral de la llingua asturiana “La imposición educativa de la llingua foriata ye una de les estratexes más conocíes y espardies de la colonización cultural, y n’Asturies sabemos ya muncho d’eso”.

Ciñéndose a lo estrictamente llegal, alcordies la Llei 1/1998, de 23 de marzu, d’ usu y promoción del bable/asturianu recueye que “El Principado d’Asturies garantizará la ensiñanza del bable/asturianu en tolos niveles y grados, respetando sicasí la voluntariedá del so aprendizaxe. En tou casu, el bable/asturiano deberá ser impartio dientro l’horariu escolar y sedrá considerao como materia integrante del currículu”. Andecha Astur aprofitó pa recordar que fasta agora, la llei incumplese na etapa d’infantil, na que l’asturianu ta ausente del currículu. “L’aprobación d’esta llei supondría l’ampliación a dos etapes d’esa illegalidá”.

Tamién incidieron nel fechu de que lo afayaizo pa estes edaes, más que la inclusión nel currículu, ye l’usu del asturianu -na variante que correspuenda- como llingua vehicular pa dirixise a la reciella.

Susana Sela

This work is licensed under a Creative Commons Attribution 4.0 International License.