La primer fase d’esti reconocíu concursu tendrá llugar el prósimu sábadu 16, en Xixón, na Sidrería La Montera Picona de Ramón y valorará 42 palos de sidre
Esti certame, entamáu pola FUNDACIÓN ASTURIES XXI en collaboración cola Revista LA SIDRA, ye ún de los concursos de sidre más importantes del país, siendo l’únicu que valora la sidre sobre la madre, ello ye, ensin trasegar ya’l segundu en cuantu a númberu de llagares participantes.
La primer eliminatoria de la XIV edición del concursu Meyor Primer Sidre L’Añu sedrá en tastia a ciegues abierta al públicu na Sidrería La Montera Picona de Ramón, el sábadu 16 a les 12:00 hores. Nella, el xuráu escoyerá les cinco meyores sidres presentaes.
El xuráu tará presidíu por Manuel Busto y como novedá esti añu participará como miembro del mesmu el Campeón nacional y mundial d’echaores, Wilkin Aquiles. Como echaores y pa garantizar que la sidre se preba nes meyores condiciones posibles, cuntaráse con Alejandra Vanegas, la muyer meyor clasificada del Campeonatu d’Echaores 2023 y Jorge Vargas, campeón del añu 2013 y tercer clasificáu nel 2023.
Les cincu sidres escoyíes pasarán a la fase final, que tendrá llugar el miércoles 20, a les 18:00 hores, tamién na Sidrería la Montera Picona de Ramón, onde se conocerá la sidre ganaora, que pasará a ser la oficial de la XIV Primer Sidre L’Añu, mercándose-y 1.000 € en sidre pa poner a dimposición de los asistentes a la q’ensin dubia ye la mayor espicha del país y l’eventu que marca l’entamu de la temporada sidrera y que tendrá llugar ente’l 28 ya’l 31 de marzu.
L’asistencia a les tasties del xuráu ye abierta al públicu en dambes xornaes, y al al rematar el concursu, y yá conocía la sidre ganador, el públicu asistente va poder prebar les sidres presentaes, pa que pueda conoceles y valorales de primer man.
Llucía F. Marqués
This work is licensed under a Creative Commons Attribution 4.0 International License.
