Parres ye’l próximu destín de la Xira pola Oficialidá. La campaña qu’entamen conxuntamente la Fundación Almastur ya Iniciativa pol Asturianu pretende movilizar a la sociedá civil asturiana sobre la importancia de protexer la llingua asturiana y defender la oficialidá.
La capital parraguesa acueye dende güei al vienres 22 de marzu diferentes actividaes que van entamar el llunes 18 de marzu a les 11:30 hores cola presentación oficial de la Xira pola Oficialidá en Parres cola presencia de Rosario Huelga, conceyala de Personal, cultura y dinamización social; Carlos Rubiera, presidente de la Fundación Almastur y Iván Llera, presidente d’Iniciativa pol Asturianu. Darréu d’ello, va tener llugar l’entamu de les visites escolares a la esposición bibliográfica y la esposición ‘Voces’ que se van allugar na Casa de Cultura de Les Arriondes.
El martes 19 a les 19:30 hores va proyectase’l documental ‘De güeles a nietes. El retu de la tresmisión xeneracional del asturianu’, una producción d’Iniciativa pol Asturianu y Cuatro Gotes que compila testimonios de 15 persones de distintos ámbitos qu’analicen esti conceptu.
La programación va siguir el miércoles a les 19:30 hores cola visualización del documental ‘El valir económicu d’una llingua’. Nesti casu, l’audiovisual pretende concienciar sobre los beneficios que supondría la oficialidá de la llingua asturiana y presenta diferentes empreses qu’usen l’asturianu nos sos productos o servicios.
El xueves 21 marzu, coincidiendo cola celebración del día internacional de la Poesía, va tener llugar un recital lliterariu a les 19:30 hores cola participación de Serxu Luaces Blanco y l’escritor Carlos Rubiera.
El programa d’actos va rematar el vienres 22 a les 19:30 hores cola charra-coloquiu ‘¿Por qué sí a la oficialidá del asturianu?’ por Inaciu Galán, miembru de númberu de l’Academia de la Llingua Asturiana. De siguío, a les 20:00 hores, Rosario Huelga va faer un reconocimientu a los y les escritores de Parres. Dempués, va cuntase con una actuación musical a cargu del gaiteru Serxu Luaces Blanco y del cantante de tonada, Rafael Díez Fernández. La selmana va pesllase cola llectura del manifiestu pola oficialidá.
Toles actividaes van desencolcase na Casa de Cultura de Les Arriondes. Iniciativa pol Asturianu y la Fundación Almastur agradecen a la conceyala Rosario Huelga y al Conceyu de Parres la collaboración pa sacar alantre esti programa.
Susana Sela
This work is licensed under a Creative Commons Attribution 4.0 International License.
