El Principado autoriza l’amenorgamientu de los controles de les emisiones Corteva, que tien una planta allugada en Valle de Tamón dientro’l complexu químicu de Dupont, en tarrenos de los términos municipales de Carreño y Corvera 

Nes instalaciones Corteva fabríquense les sustancies denomaes comercialmente “JE874” y “Picoxystrobín” usaes para fabricar funxicides. Emplega cloru para la fabricación de fosxenu (COCl2), fenilhidracina (que causa desaniciu de glóbulos coloraos, dolor de tiesta, estomagaes, vultures, sensación d’esmorecimientu, nerviosismu, temblones, ataques, dañu al fégadu y los reñones, coma y muerte), hesanu (que produz mancadures nos nervios y paralises de los brazos y piernes), piridona (canceríxenu 2B), ciclohexanona (que causa vértigu, narcosis, estomagaes, vultures, trestornos dixestivos, dolor de tiesta, coma y muerte), un misteriosu “ingrediente 5B” y catalizadores ensin identificar.

Los controles sobro esti tipu de productos tienen de ser rigurosos y yá nun yeren consideraos suficientes polos ecoloxistes, pero d’equí p’arriba van controlase entá menos. En concretu, los contaminantes de los que van reducise los controles son Compuestos orgánicos Volátiles (COV), Partícules, Monósidu de Carbonu (CO) y Ósidos de nitróxenu (NOx) que va pasar de semestrales como fasta agora, a añales como pidi la empresa.

Dende’l principiu la Coordinadora Ecoloxista vienen reclamando que nel complexu de Dupont se faiga “un control rigorosu y refechu de les borrafes, emisiones y arramaos d’esta instalación industrial, lo que fai’l Principáu ye xustamente lo contrario, controlar menos los contaminantes que puedan producise, aumentando’l riesgu pa tolos que viven na so redolada.”

Susana Sela

This work is licensed under a Creative Commons Attribution 4.0 International License.