N’Asturies el volume de persones que precisaron una ayuda social creció un 15% en seis meses, afondando nel procesu de recesión y xeneralización de la probitú empecipiáu poles polítiques de  desindustrialización y de destruición del texíu sociu-económicu asturianu desendolcaes pol PSOE a lo llargo de décades de gobiernu

19.582 asturianos perciben el IMV, de los que la mayoría, 13.149, son muyeres. Cuasi 50.000 persones viven d’esos salarios, 17.217 d’ellos son menores. A ello hai que sumar les 11.504 nómines de Salariu Social que dan cobertoria a alredor d’otres 24.000 persones. Ello ye, qu’alredor de 75.000 asturianos (asturianes, mayormente) dependen d’un d’estos salarios, un 15% más que va seis meses.

Estes cifres asitien a Asturies como un de los territorios del estáu con más persones en necesidá de percibir esta prestación, en númberu netu, perriba de comunidaes españoles con muncha más población. Ostenta tamién la peor cifra de la Cornisa Cantábrica.

Pa entender el significáu real d’estos datos hai que ponese en situación. Una familia monomarental con dos fíos a cargu (que suponen el mayor porcentaxe de beneficiarios) percibe, incluyendo los 115 euros del complementu d’ayuda a la reciella, escasamente 10 euros al día por persona colos que cubrir tolos sos gastos; una bones cubiertu’l gastu mediu de vivienda, nun se llega a los cinco euros por persona y día. 

La continuidá del procesu políticu de desindustrialización y de destruición del texíu sociu-económicu asturianu, l’abandonu de lo rural, l’apueste por sectores -como’l turísmu- que nun xeneren riqueza y la elevadísima precariedá llaboral escarecida lleva a los asturianos a esta situación na que la única salida posible pa munchos seya la emigración.

Llucía F. Marqués