L’eventu, qu’esti añu cellébrase del 28 al 31 n’Atalaya de Cimavilla (Xixón) cuenta con una gran carpa na qu’abellugase de la posible lluvia y del aire de la mariña
Dende mañana fasta la tarde’l domingu, la Primer Sidre l’Añu más playa la hestoria abre les sos puertes con sidre a esbardiar y un ampliu programa d’actividaes que ya pue consultase na so páxina web, disponible n’asturianu, español ya inglés.
La inaguración, col pregón a cargu del cantante y escritor Carlos Rubiera, autor entre otros muchos temas del popularísimu cantar ‘La Capitana”, sedrá a la una de la tardi, xusto anantes de la entrega de premios a los llagareros ganadores de la Meyor Primer Sidre L’Añu: Meyor PSLA y Sidra oficial de la PSLA: Prado y Pedregal, Segundu clasificáu Sidra Peñón y Tercer clasificáu Sidra Cabueñes.
El Culín inaugural correrá a cargu de la echadora Alejandra Vanegas y darréu pasaráse al Echáu coleutivu con representantes de les principales cofradíes gastronómiques asturianes.
Mañana va ser un dia perespecial pa los amantes del bien echar la sidre, con duple eshibición, pela mañana del equipu de La Montera Picona, con Wilkin Aquiles, Campeón d’Echaores d’Asturies 2023 a la tiesta, y pela tardi de Salvador Ondó, cinco vueltes campeón d’Echaores, que amás dará una clase práutica. Los rapacinos tamién van poder practicar a echar sidre, nesti casu con agua.
Dientro les actividaes programaes pal día destaca tamién la tastia guiada de Sidre de la Macaronesia (IGP sidra da Madeira, y sidre de Tenerife y Gran Canaria) a cargude Donato X. Villoria, xuráu del SISGA y la Tastia guiada de Sidra Prado y Pedregal, Meyor Primer Sidre L’Añu y Sidra Oficial de la PSLA, a cargu de Juan Luis García, profesor de la Escuela d’Hostelería y Turismu de Xixón. Como tolos díes, cuntaráse cola actuación de la Banda de Gaites El Gumial y la reciella esfrutará de dellos Xuegos tradicionales.
Llucía F. Marqués
This work is licensed under a Creative Commons Attribution 4.0 International License.
