Balance positivu d’una Primer Sidre l’Añu pocu avezada

1 Abril, 2024

Pesi al cambeu d’allugamientu y les complicaciones derivaes de tener qu’organizar too n’otru sitiu y a cabera hora, la PSLA pue consideráse un ésitu, con cerca de siete mil persones que, incluso coles turbonaes d’estos díes, subieron a l’Atalaya pa esfrutar de la sidre ya’l bon ambiente

La cultura de la sidre tien que ser daqué vivo y nun quedar arrequexada en pasucais y actuaciones cara al turismu. A los asturianos gústanos vivila y tamién compartila con quien venga de fuera y quiera conocela de primer man. Por eso son importantes eventos comu la Primer Sidre l’Añu, entamada pola Fundación Asturies XXI en collaboración cola Revista LA SIDRA, onde se da a prebar la sidre nuevo de mediu centenar de llagares, reviviendo la tradición de les espiches de Semana Santa, mientres se esfruta de la música’l país y multitú d’actividaes venceyaes a la tradición asturiana.

Esti añu alcontráronse na difícil situación d’enterase con 40 dies d’antelación de que nun podríen utilizar la so sede avezada, el Muséu del Pueblu d’Asturies, por motivos entá non esclarecíos, y que se yos asignare, namás una selmana anantes, l’Atalaya, en Cimavilla, con toles complicaciones d’accesu, infracadarma, gastos estra, papeleos d’última hora y publicidá del eventu qu’ello implicó.

Sicasí, destaquen el bon resultáu de la edición que resumen comu “Cuatro díes de la más auténtica folixa sidrera, 34 hores de música’l país ininterrumpida, cuatro mayaes faciendo sidre cola reciella, ocho tasties de sidres asturianes ya internacionales, tres talleres d’echar sidre –pa piqueños y mayores- , tres esibiciones d’echar sidre colos meyores profesionales del momento, un concursu de sidre casero sobre maera, otru d’echaores amateurs, asturianada, pandererteres, mediu centenar de palos de sidre, esportes y xuegos tradicionales… y munchu baille colos brazos n’alto. Delgún altercáu, dengún accidente, denguna estroza. El saldu de la Primer Sidre l’Añu ye positivu, pesia toles dificultaes coles que la organización tuvo d’enfrentase pa sacalu alantre y de les que mos gustaría que mos desplicaren dende l’Ayuntamientu”.