Cogersa incorpora a 25 peones de Vareser y despídelos nel so primer día de trabayu
“Caún d’estos trabayaores despidíos tien una vida, tien una familia, tien unes necesidaes qu’agora mesmo queden en precario. Que pa enriba seya’l ‘Principado’ el responsable direutu de la situación pon tovía más n’evidencia les polítiques d’ Adrián Barbón”
El Consorciu de Xestión de residuos (Cogersa) cumplía ayeri col so compromisu de contratar a los trabayadores de la empresa esterna Vareser, 64 conductores y 35 peones de sofitu a la recoyida. Según l’alcuerdu “la nueva empresa encargada de realizar el serviciu va respetar el contratu esistente ente’l trabayador”.
A los 25 afectaos convocábase-yos ayeri, primer día en que s’incorporaben a la plantiya de Cogersa, na sede central de la empresa, “pa informa-yos sobre la reorganización del serviciu”. La nueva organización consistía nuna carta de despidu, con una indemnización cercana a los 2.000 euros pa caún.
Los compañeros que trabayen na recoyida de Xixón, otros once, van quedase unos díes más, pero tampoco van formar parte de la plantiya de la empresa.
Dende Andecha Ástur consideren que se tomó el pelu a estos trabayadores y fixeron yá declaraciones al respeutu, recordando que Cogersa ye una empresa dependiente del Principáu, cuestión que teóricamente tendría d’ufiertar más garanties pero que, como tamién se vio colos casos de EBHI y el recién despidu inxustificáu de la EMA, ta resultando tolo contrario.
“Caún d’estos trabayaores despidíos tien una vida, tien una familia, tien unes necesidaes qu’agora mesmo queden en precariu. Que pa enriba seya’l ‘Principáu’ el responsable direutu de la situación pon tovía más n’evidencia les polítiques d’ Adrián Barbón” declararen.
Nel Dos Santos
This work is licensed under a Creative Commons Attribution 4.0 International License.
