Llucía F. Marqués
Les estratexes de venta de los nuesos gobernantes foron variando nes caberes décades, de Paradisu a muséu y d’ehí a parque temáticu. Lo que tienen bien claro ye que, pa ellos, Asturies –o un cutre asonsañu de si mesma- ta en venta
Hai tiempu que lo alvertíemos, Asturies entamaba a ser un muséu de si mesma. Muséu de la minería y la industria, del ferrocarril, de la siderurxa… ¿la escuela rural? Un muséu; ¿los bolos? Un muséu; ¿la gaita? Un muséu. Tolo que fore diendo a menos, en llugar de remocicalo, enterróse direutamente nun muséu. Incluso’l que presumía ser un muséu de tradición viva, el Muséu del Pueblu d’Asturies, rindióse a la corriente de muséu testimonial, podríemos decir pa esfrute de turistes, pero nin siquier; munchos d’estos museos remanecen presllaos bona parte l’añu, el resto, cuasi vacíos.
D’ehí pasemos rapidamente por una peculiar fase de grandonismu: les lletrones, con toponimia siempres enquivocada, y les coses (navaya, gaita, pandereta…) más grandes del mundiu, que polo menos tienen la so gracia. Too seya por apurrir un escenariu pa la semeya, como si la Sierra’l Sueve o la mar nun foren bastante bon fondu pa escolingar la foto n’instagram.
Agora damos un pasu más, de muséu a parque temáticu; pero nin siquier parque de temática asturiana. Un pitufu (repunante, eso si) en Llugones y agora un “Danonino” nun parque de Salas –si, onde acaben d’esbarrumbar una panera- apunten la direición na que camina Asturies: un parque d’atracciones xigante pa esfrute del turismu más vulgar. ¿Onde queden en too esto los asturianos? Tres de la barra, de feriantes o llimpiando los restos de la marabunta en finando’l branu, que con lluvia el paradisu mola menos.
Nota al marxe ¿Qué sentirán los 69 despidíos de la planta de Danone de Salas y les sos families al pasar pel parque?
This work is licensed under a Creative Commons Attribution 4.0 International License.
