El conseyeru de Facienda, Guillermo Peláez, lleva la contraria a los datos espublizaos pol Ministeriu d’Economía, que destaca a Asturies pola escasa eficiencia na xestión de los fondos europeos

Asturies tien asignaos al traviés de les distintes convocatories sectoriales un global de 726 millones d’euros para ser xestionaos pola Alministración del Principáu, de los que fueron utilizaos 227,6 millones. Poro, foi reseñáu nel informe del Ministeriu d’Economía como un de los territorios del estáu que peor ta xestionando los fondos que se-y concedieron.

Los datos son lo de menos. Peláez considera que’l Principáu caltien un “bon ritmu d’execución” de los fondos europeos del Mecanismu de Recuperación y Resiliencia, porque na metá del plazu para utilizalo, Asturies yá abonó más d’un terciu de les ayudes.

Un terciu. Na metá del tiempu.

Eso ye, según el Principáu, un bon ritmu. Traducio a la totalidá del plazu p’aplicar el total de los fondos europeos consiguíos, implicaría que s’utilizaríen con suerte dos tercios d’ellos, devolviéndose’l restu. Pero nun tenemos d’esmolecenos, porque tien razón, son bones cifres…  de normal queden ensin aplicar más de la metá.

Nel Dos Santos

This work is licensed under a Creative Commons Attribution 4.0 International License.