La falta de personal y de ferrocarriles en Renfe fuercia a camudar los servicios contrataos por Arcelor Mittal y a tresportar en camiones el mineral estrayíu de la so cantera nel Naranco n’Uviéu hasta les sos factoríes
Hai meses que se van produciendo alteraciones nos dos servicios de tresporte per ferrocarril qu’Arcelor Mittal tien contratao con Renfe de llunes a vienres pa tresportar el mineral estrayíu de la so propia cantera nel Naranco hasta la factoría de Veriña, en Xixón. Esti cambéu, que se resuelve tresportando la carga en camiones en cuenta de trenes, supon un grave problema ambiental y de seguridá nes carreteres asturianes y aumenta la elevada contaminación de la zona central.
El tresporte de mercancíes en ferrocarriles tien una escasa siniestralidá, ye muncho más caltenible y respetuoso col mediu ambiente que’l tresporte per carretera, y evita los diversos problemes de circulación del tráficu. Coles mesmes, esti cambéu agrava’l gran problema que tenemos pola escesiva dependencia del tresporte de mercancíes en camión en desterciu del tren, pesi a la notable rede de víes que tenemos n’Asturies y de les continues subvenciones europees p’aumentar el tresporte por ferrocarril.
La cantera, qu’empecipió la so esplotación en 1964, allugase na fastera norte del Monte Naranco, na parroquia de Villapérez, y consta d’una superficie llaboriada de 201,31 hai d’una concesión de más de 400 ha. Abastez a la siderurxa de dolomía que se tresporta en ferrocarril per unes víes qu’algamen la estación de Llugones, en Siero.
Dende la Coordinadora Ecoloxista consideren que l’alteración d’esti sistema de tresporte contribúi a empiorar la problemática que la multinacional yá causa n’Asturies, polo que-y piden al Gobiernu d’Asturies qu’esixa a Renfe una solución permanente y estable.
Alberto Rodríguez
This work is licensed under a Creative Commons Attribution 4.0 International License.
