El grupu musical Xera ta acabante d’estrenar un adelantu del so cuartu álbum: el tema musical “Corales de Cristal” que ya ta disponible en toles plataformes de distribución de música dixital.

Pa cellebrar la torna de Xera, preséntase dafechu el so vídeo musical que ya algamara la distinción de plata nel Berlín Music Video Awards y ta selecionáu pa competir pol premiu a meyor videoclip 2024 nel Barcelona Indie Filmmakers Festival. El vídeo ta disponible nel canal oficial Youtube de Xera.
El proyectu musical “Xera” entamenlu nel 2004 Carlos Díaz (Vérval) y Iria Flavia R. Álvarez. El estilu amesta música folk asturiana tradicional y de nueva creación con elleutrónica. Xera algamara el so primer ésitu nel so primer álbum “Lliéndes” en 2006 gracies asones como el que-y da nome al album, que fuera sintonía de la Vuelta Ciclista a Asturies. Ya en 2010, Xera algama el premiu de la música asturiana (AMAS) al meyor álbum folk con el segundu discu “Tierra”.
El cantar del mesmu nome algamaría tamién el Premiu al Meyor Cantar 2010 y un segundu puestu nel festival europeo de la música “Liet International”. Dempués Xera entamaría col desendolcu d’ un
direutu más trabayáu pa algamar un soníu envolvente multicanal nos conciertos. En 2012 Xera presenta el so cuartu álbum con tecnoloxía multicanal 5.1 nel auditoriu del Centro Oscar Niemeyer d’Avilés,
algamando por ello en 2013 el premiu de la música asturiana a meyor directu. Tres desendolcar un formatu acústicu y espublizar un EP del mesmu, Xera saca un últimu son en 2014 nomáu “Lucas” y pararía de espublizar material.
Col nuevu cantar y videoclip, “Corales de Cristal”, la formación rompe el so silenciu y torna cola mesma enerxía y un soníu más consolidáu.

Nel Dos Santos

This work is licensed under a Creative Commons Attribution 4.0 International License.