La ciudadanía de Xixón respuende masivamente al llamáu d’un Pulmón pal Solarón, llantando media centena d’árboles autóctonos

La plataforma Un Pulmón pal Solarón llamare a llantar esti domingu árboles d’especies autóctones pa revindicar que l’espaciu verdi qu’ocupa lo que yera l’antigua estación central de xixón y les istalaciones del ferrocarril se destine de manera definitivo a parque públicu, meyorando la redolada urbana con un espaciu verdi arboláu, en llugar de destinase a edificar nelli. 

Al llamáu acudieron varies decenes de persones, ente elles munches families con reciella que quieren una meyor ciudá pal futuru. Pente toos llantaron alrodiu de cincuenta árboles, toos d’especies autóctones. Tamién se semaron delles plantes de flores, asonsañando una viesca o un xardín.

Sicasí, son conscientes de la dificultá pa qu’estos árboles prendan, ensin l’atención que precisen y metanes una zona de pasu, pudiendo incluso, como pasó n’anteriores ocasiones, ser retiraos direutamente polos encargaos de la xestión de los praos del Solarón.

Piden a los vecinos collaboración pa curiar esta plantación y ayuda pa conservalo. 

Llucía F. Marqués

This work is licensed under a Creative Commons Attribution 4.0 International License.