Pesi a tar denunciaos y n’investigación por fechos asemeyaos, tornen prohibir a un vecín d’Illas presentar un escritu oficial n’asturianu.

Estes situaciones desapaeceríen con reconocer la oficialidá del asturianu.

La Llei 1/1998, de 23 de marzu, d’usu y promoción del bable asturianu, ye una llei vixente que regula los drechos de los ciudadanos a utilizar l’asturianu y l’obligación de l’alministración a faer qu’estos drechos se cumplan. Foi aprobada pola Xunta Xeneral del Principáu d’Asturies y espublizada el 23 de marzu de 1998. Nel so Capítulu II, artículu cuartu, recuéyese’l drechu a utilizar l’asturianu en comunicación oral o escrita cola alministración pública.

Van 26 años dende que s’aprobó esa llei y sicasí son munchos quienes la desconocen… o quisieren desconocela y a cencielles, nun l’apliquen. El del Ayuntamientu d’Illás ye un casu estremu, col alcalde, Fernando Alberto Tirador Martínez,  d’IU, ya n’investigación por prevaricación y discriminación llingüística por una denuncia interpuesta en xunu del añu pasáu. 

Agora vuelven a les andaes y esti doce d’abril un vecín recibió como rempuesta a un recursu de reposición una carta na que s’especifica que nun se tendrá en cuenta la so comunicación “Atendiendo a que el asturiano no es idioma cooficial en esta autonomía” y faciendo una interpretación personal y restrictiva de la citada llei.

La solicitú del vecín ta relacionada col permisu pa facer una obra cenciella en so casa, en concreto la sustitución d’una puerte y una ventana, pa lo que nun se-y quier dar permisu, lo qu’amuesa non solo la voluntá discriminatoria sinón la mala fe ya intención dolosa por parte del rexidor Illense y los sos subordinaos.

Susana Sela

This work is licensed under a Creative Commons Attribution 4.0 International License.