Según los datos oficiales publicaos güei pol INE la cifra total de turistes agospiaos n’establecimientos hoteleros de Xixón mientres el mes de marzu ye de 32.466 persones con una estancia media de 2,0 nueches lo que supon un total de 65.485 pernoctaciones.

A la d’analizar les variaciones al respective de 2023 tien de tenese en cuenta que, en 2024, la Selmana Santa cellebróse en marzu, cuando lo más avezao ye qu’esto asoceda n’abril y que tenemos de remontanos a 2018 o a 2016 p’atopar años nos qu’estes fiestes celebrárense tamién en marzu.

Por esti motivu, el númberu de viaxeros agospiaos en marzu  medró un +33,3% respectu al añu pasáu lo que nun torga destacar que se trata de la segunda meyor cifra de viaxeros de la serie histórica (32.466 persones) y que namás ye superada polos 34.926 turistes agospiaos n’establecimientos hoteleros en 2016. La cifra de viaxeros foriatos marca en 2024 un máximu históricu (4.051 persones).

El 17,5% de los turistes agospiaos n’establecimientos hoteleros vien de la Comunidá de Madrid, el 12,8% de Castiella y Llión y el 12,5% de Galicia; los viaxeros foriatos representen el 12,5% del total polo que ye’l porcentaxe más eleváu de la serie histórica.

No que cinca al númberu de pernoctaciones la cifra xube -como yá se señaló- a 65.485 places ocupaes, polo qu’aumenten nun +24,9% respectu al añu pasáu y tamién ye la segunda cifra más elevada de la serie histórica dempués de la rexistrada en 2016. Les pernoctaciones xeneraes polos viaxeros foriatos aumenten nun +36,1% al respective de 2023 y asítiense en 9.357, la cifra más alta de la serie histórica pa un mes de marzu (2.176 más qu’en 2016).

La tasa d’ocupación, rexistrada en marzu en Xixón asitiase nel 44,1% polo que ye un +22,0% mayor que la rexistrada l’añu pasáu (36,2%) y asemeyá al 45,1% rexistráu en marzu de 2016 (meyor datu de la serie).

Estes cifres tradúcense nun xorrecimientu de la facturación del sector hoteleru (en conceutu d’agospiamientu) d’un +54,6% algamando la cifra de 2,7 millones d’euros, una cifra nunca antes vista pol sector nun mes de marzu (la siguiente na serie son los 2,2 millones facturaos en 2019).

Susana Sela

This work is licensed under a Creative Commons Attribution 4.0 International License.