Tapia tien un prometedor futuru basáu nos sos recursos naturales, paisaxísticos, ambientales y padrimoñales, que dexa los beneficios nos sos moraores y que se verá desaniciáu si se prioriza la velea del oru pa beneficiu foriatu
Los tiempos d’esplotación y espoliu, aniciaos en tiempu de los romanos, nun finaron p’Asturies. Pesi a la oposición vecinal, acomuñada na Plataforma Oru Non, pesi a los evidentes daños pal entornu, los perxuicios pa los medios de vida tradicionales, les consecuencies ecolóxiques a cortu y llargu plazu ya en contra de los deseyos de vecinos, pescadores, ganaderos, agricultores, hostelería, turismu activu y otros, el que se fae llamar (ensin selo) el “yacimientu d’oru más grande d’Europa”, allugáu en Tapia de Casariegu, avanza na so ampliación.
Según informa con gayola Dominic Roberts, presidente executivu de la compañía titular de los drechos d’esplotación, Black Dragon, ta a piques d’entamar la tramitación recalificar de los terrenos pal so usu mineru. Una decisión por parte del Conceyu de Tapia, por petición de la empresa, que sosprende depués del posicionamientu teóricamente contrariu amosáu pol alcalde nel conceyu sobro’l tema, va menos d’un añu.
Esti avance sobre’l yacimientu d’oru de Salave llega malpenes un mes depués de que la compañía anunciare una ampliación de capital a traviés de la so filial Explotaciones Mineras del Cantábrico (EMC), que supera los 720.000 euros y del que formen parte inversores de tol mundu, que cuenten con rentabilizar ampliamente la so inversión a costa d’Asturies y ente los que nun alcontramos asturianos.
Llucía F.Marqués
This work is licensed under a Creative Commons Attribution 4.0 International License.
