El Conceyu contra la Incineración d’Asturies, plataforma formada por abondes asociaciones y colectivos y con más de 30 años d’historia na lucha contra la quema de residuos y la creación de plantes incineradores, llanza la so primer campaña de crowdfunding col envís de recaldar donaciones solidaries
La intención ye xenerar un fondu económicu de sofitu que permita, en primer llugar, afrontar los gastos llegales pa la y poder crear un presentación d’un Recursu Contenciosu Administrativu contra la quema de CSR (Combustible Sólidu Recuperáu) na térmica de La Pereda, en Mieres.
“Esta decisión representa un grave riesgu pal nuesu queríu Paraísu Natural y pa la salú de la comunidá. La incineración d’estos residuos nel centru de Asturies va xenerar contaminación ambiental nun ampliu radiu de kilómetros, emitiendo sustancies altamente tóxiques como dioxines, furanos y metales pesaos”, alvierten, al par que remembren la esistencia d’estudios asgaya que demuestren que la esposición a los compuestos derivaos de la quema de basoria ta rellacionada col desenvolvimientu de cáncanos, enfermedaes cardiovasculares, respiratories y malformaciones, afectando especialmente a los grupos más vulnerables, como reciella, persones mayores y embarazaes. Amás, estes sustances envelenen a los animales, l’agua, la tierra y los cultivos.
Amás de torgar la puesta en furrulamientu d’esta planta, ta pente los oxetivos d’esta plataforma l’influyir na formulación d’un Plan de Residuos responsable, que respete tantu al mediu ambiente como a la sociedá. Pa ello cuenten cola esperiencia y compromisu d’Asociaciones y profesionales qu’históricamente trabayaron nesti ámbitu y col respaldu d’un equipu xurídicu solvente y especializáu, pero precisen de fondos pa cubrir los costes de les aiciones llegales, estudios téunicos, comunicación y demás xestiones, polo que soliciten collaboración ciudadana.
Con esta campaña pretenden algamar alrodiu de 10.000€ y tará abierta hasta el próximu 7 de xunu.
Alberto Rodríguez
This work is licensed under a Creative Commons Attribution 4.0 International License.
