Hasta 22 vaques muertes nun añu, envelenaes o cenciellamente a tiros. Denuncies y trabes de continuo, ya incluso numeroses multes, por pacer les vaques, pesi a qu’afirma cuntar con permisu pa ello
Belarmino Canella, vecín de Soto d’Agues (Sobrescobiu) ye titular d’una ganadería n’estensivu d’alrodiu de noventa vaques. En so día foi guarda del Principado, destacando por nun facer la vista gurdia ante les infracciones, lo que nun lu ayudó precisamente a ganar amistaes; ya d’aquella hebio quien mandare un escritu al Principado pa quitalu de guardia. Agora tampocu calla ante los abusos de poder nin ante les illegalidaes.
D’una carpeta saca un fargatáu de documentos llegales, tien munchos más en casa, cuéntanos, entamando a desgranar el so calvariu. Sobre tou, multes y denuncies, la cabera por salise les vaques de la so finca el 22 d’abril, a una selmana d’abrise oficialmente los pastos -cuestión, la del acotamientu, cuya xusticia tamién plantega-. Nesta cabera denuncia nin siquier se identifiquen los animales col correspondiente crotal, nin s’apunta la titularidá o allugamientu de los praos nos que, teóricamente, entraron los animales.
Elli nun lo pon en dubia, nun ye una cuestión de faltes pola so parte “El problema ye la ganadería, que quieren quitame el ganao por coyones” resume. Esta persecución hacia la so persona ya foi puesta en conocimientu del Ayuntamientu ensin qu’esti tomare les debíes midíes pa solucionar el problema. Tampoco nun tomaron midies pa resolver otres cuestiones denunciaes por Belarmino, tanto ante l’Ayuntamientu como la Conseyería: l’usu d’herbicides en praos de pación, el pasu de cableáu per caleyes públiques ensin dala autorización, el preslle de caminos por parte de particulares o la edificación privao en terrenos de titularidá pública.
Tou ello debuxa un conceyu nel que la llei importa pocu y onde les amistaes y favores debíos son lo que más pesen. Pero lo más grave nun ta ehí.
La ganadería de Belarmino carez de continuos ataques, más direutos que multes y denuncies. Los sos enemigos -él sabe bien quienes son, pero nun los menciona a falta de prebes- tan matando les sos vaques.
Nes semeyes pueden vese les marques de los tiros que recibieron delles (nel craneu la primera, cerca’l caldar la segunda), otres foron envelenaes, hasta 22 animales nun solu añu
Tampocu nesto actúa denguna autoridá.
Llucía F. Marqués
This work is licensed under a Creative Commons Attribution 4.0 International License.
