La ineficiencia na xestión de la Salú Pública Asturiana ye tala que nun se cubren les baxes méliques nin siquier en centros de salú nos que la persona que ta de baxa ye l’únicu mélicu, comu ye’l casu de Carbayín Altu, onde lleven dies col consultoriu preslláu.
Puede sonar a poca cosa, pero la falta del únicu mélicu qu’atienden a cerca de mil persones, más nuna Asturies avieyada y poro, con abondes necesidaes asistenciales, tien munches consecuencies. Entamando pola más evidente, el retrasu n’atención, con cites que tan dándose a diez díes vista ya ensin seguridá de si van poder cumplise. Siguiendo pola obligación pa les persones que necesiten atención más urxente de desplazase a otros centros, comu Carbayín Baxu o Valdesoto, ya saturaos de por si, pa lo que la cuestión complícase ante una segunda ineficiencia: la del tresporte públicu, insuficiente y con horarios que nun s’adapten a les cites méliques; y rematando col abandonu de los pacientes que’l mélicu de Carbayín Altu aveza atender a domiciliu per tola rodiada, persones que tienen dificultá pa desplazase dende los sos llares al so centru de salú y qu’agora vense nel casu de tener que dir non solo al ambulatoriu, sinón a otru más allonxáu de lo avezao.
Nun ye la primer vegada qu’esto pasa, l’añu pasáu viéronse nes mesmes circustancies, y tampocu ye l’únicu sitiu onde se viven situaciones asemeyaes. Baxes y vacaciones nun son cubiertes, dexando desatendies les necesidaes sanitaries de miles d’asturianos.
Too ello sofita dos fenómenos igualmente dañibles pal conxuntu d’Asturies: la necesidá d’acudir -quien pueda- a la sanidá privada y l’abandonu de les zones rurales hacia urbes con mayor atención sanitaria.
Llucía F. Marqués
This work is licensed under a Creative Commons Attribution 4.0 International License.
