La Fundación Almastur entama en Garbelles (Caldones) unes xornaes cientraes na güelga de los primeros astures na morfoloxía del país
Les xornaes, que se cellebrarán el 18 de mayu ya’l 1 de xunu na Sala Almastur, en Garbelles, tendrán comu protagonistes al etnógrafu Ástur Paredes y al Dr. arquiteutu Xuán Pedrayes.
Na primer sesión el tema a tratar sedrá “La formación de les aldees”, estremándose la ponencia en dos partes con una posa a medies. Per un llau, Ástur falará del procesu de cambiu dende’l castru a la villa/aldea del S. XI y na segunda parte introducirá la cuestión de l’aldea como unidá d’análisis del territoriu asturian, tocando temes comu la casería, el Conceyu Abiertu y les ordenances, pente otros munchos, viendo la evolución fasta l’aldea d’anguañu.
La segunda xornada tará centrada en “Les brañes y l’hábitat vaqueiru”, con una ponencia na que Xuán Pedrayes entamará falando de la revolución neolítica pa dir avanzando nel tiempu y nes característiques d’esta cultura tan estremada ya’l so hábitat, fasta poner en cuestión la so crisis y abegosu futuru.
Les dos xornades entamarán a les diez de la mañana y presllarán a les dos con una espicha pa los asistentes y pa participar ye imprescindible reservar plaza previamente. El coste ye de 30€ ca charra y 50€ les dos.
Susana Sela
This work is licensed under a Creative Commons Attribution 4.0 International License.
