Dolce años bastaron pa que les Cuenques, un de los polos económicamente más activos de Asturies, perdieren la vitalidá que los caracterizaba.

Descarbonización, fin de la minería, robu de los fondos mineros que tendríen de revitalizar la zona, despoblación y avieyamientu, tollo son factores que, xuníos a l’apertura de centros comerciales, fueron desaniciando los pequenos comercios de tal manera que presllaron les sos puertes más del 20% de les tiendes y establecimientos hosteleros, tantu de la cuenca del Caudal como del Nalón, dende 2012. Si nesa fecha -cuando yá empezara’l cayente- había un total de 3.292 pequenos comercios y negocios hosteleros, a finales del 2023 la cifra amenorgóse a 2616.

Nin siquier les localidaes qu’apuesten pol turismu llibren d’esti amenorgamientu, evidenciando una vegada más qu’esa opción nun ye nin de llueñe la panacea.  El conceyu en que l’amenorgamientu ye mayor ye n’Ayer, con una baxada del 28 per cientu. Los dos grandes conceyos, Llangréu y Mieres, rexistraron cifres bien asemeyaes, del 22,5 y del 22,3% respectivamente. Hai una única esceición, que ye la del conceyu de Casu, onde les cifres ameyoraron, pasando de 33 a 37 pequenos negocios.

Nun podemos escaecer que nesi periodu les Cuenques perdieron nada menos que el 14% de los sos vecinos y que los restantes vieron notablemente menguada la so capacidá adquisitiva.

Alberto Rodríguez

This work is licensed under a Creative Commons Attribution 4.0 International License.