Un total de 15 baristes de tol estáu van participar na edición tercera del Campeonatu d’España de Latte Art Grading (LAGS), que va tener llugar en Xixón el 3 de mayu nel Hotel Abba Playa. Les batalles preliminares van celebrase de 10 a 13h y les finales de 14.30 a 16h. L’accesu ye de baldre y va haber zones de prebes y d’esposición
El Latte Art xurdió nos años 80 y ye l’arte de facer dibuxos sobre la lleche emulsionada. Exhibióse pela vez primera nun mundial en 2002. Amás de téunica, requier de tiempu y práutica abondo. El sistema LAGS creóse va cinco años n’Italia por Luigi Luppi y permite cualificar el nivel d’un barista nesta téunica.
La celebración en Xixón d’esti campeonatu parte de la iniciativa del barista Adrián Fernández Menéndez, coordinador n’España del sistema LAGS y fundador y direutor de Servicios Exclusivos de Café SL y del establecimientu Go Coffee.
El ganador de cada categoría, Verde, Coloráu y Negru, va tener l’honor de representar a España na Final Mundial de LAGS, que se va celebrar anguaño na seronda n’Emiratos Árabes.
Precisamente, el direutor de Visita Xixón, Daniel Martínez Junquera, comentó na presentación d’esti eventu que “el fechu de sofitar la celebración d’esti campeonatu sigue una estratexa p’algamar otros eventos más grandes y poder aspirar nun futuru a tener equí en Xixón el campeonatu’l mundu de LAGS”. Nesi sen, Adrián Fernández plantegó la posibilidá de presentar candidatura pal campeonatu del mundu de 2026, el próximu que se celebra fuera d’Italia.
Susana Sela
This work is licensed under a Creative Commons Attribution 4.0 International License.
