Continúa la guerra de Foro contra todo lo asturiano. Primero fueron a polos músicos, depués a polos poetes. Siguieron atacando a los sidreros y agora van a polos esportes. Nun hai ámbetu nel que’l gobiernu de Moriyón nun cargue contra lo asturiano.
El programa d’esporte qu’atropa la ufierta municipal d’actividaes esportives en marcha va 13 años, “Préstame facer deporte” camuda y pasa a llamase “Me gusta hacer deporte’. Por si quedaben dubies de que’l problema ye la llingua, en conceyal d’esportes, Jorge Pañeda, desplicó na Xunta Rectora del Patronatu Deportivu Municipal que’l motivu d’esta decisión ye “nun confundir a les neñes y los neños colos idiomes”.
Pa compensar, aleguen que ye la primer vegada qu’otru programa, el de Vacaciones Deportives, inclui esportes asturianos tradicionales, comu los bolos asturianos y la petanca, demostrando’l so fondu desconocimientu de la tradición asturiana al nomar comu asturianu un esporte d’orixe francés y fuerte tradición castellana comu ye la petanca.
Recordemos qu’esti enésimu ataque aporta depués de menaciar la música n’asturianu, quitar la poesía fecha nel nuesu idioma y torgar fasta lo increyible la cellebración de la Primer Sidre l’Añu, trayendo de vuelta los toros y afalando procesiones de selmana santa nuna cruzada ultraespañolista que nun precisa de VOX pa traer a Xixón lo más rancio de la drecha facista.
Llucía F. Marqués
This work is licensed under a Creative Commons Attribution 4.0 International License.
