El manifestamientu convocáu pal 19 de mayu denuncia la reducción de consultes, l’amenorgamientu d’operaciones y la desapaición de servicios

La plataforma “Salvemos nuestro hospital” convoca un manifestamientu pal 19 de mayu al pie del Hospital de Jarrio. Consideren que’l centru pasa pel so pior momentu, y eso ye muncho dicir pa un hospital que lleva años apinando reclamaciones. 

Desaníciense dalgunos servicios, comu’l de dermatoloxía, caen les operaciones y amenórguense les consultes, les llistes d’espera y los plazos pa ser atendios medren, con seis meses d’espera por una consulta d’oftalmoloxía, por casu, o tres meses pa una cita n’oncoloxía, especialidá na que la rapidez ye lliteralmente vital. Les prebes méliques tamién sumen esperes más llargues que les ya inadmisibles nel restu d’Asturies.

Pesi a que Jarrio llidere la movilización, con avezaes protestes vecinales, la situación nun difiere tanto na mayor parte del territoriu asturianu, con llistes d’espera de nueve meses pa una atención xinecolóxica en Xixón o de ocho pa traumatoloxía en Llangréu. por poner un par d’exemplos.

Entantu, el Serviciu de Salú del Principáu treslladaba la selmana pasada una “valoración global positiva de la situación sanitaria asturiana”, evidenciando que lo qu’ellos consideren positivo nun tien porqué lo ser pal restu de los asturianos.

Llucía F. Marqués