Afirmen que les novedaes del documentu presentáu pol Gobiernu d’Asturies nun nos averen a una meyora na xestión de la contaminación nin a un aire respirable de meyor calidá

La conseyería de Transición Ecolóxica presentó’l Protocolu d’actuación n’episodios de contaminación del aire nel Principáu, un documentu qu’afita’l marcu d’actuación y les midíes pa facer frente a episodios puntuales de concentraciones de determinaos contaminantes atmosféricos superiores a los niveles permitios y qu’incorpora delles novedaes respectu al del 2018. Una actualización que, según los ecoloxistes, resulta del tou ineficaz y dexa ensin resolver los problemes ambientales.

Una de les novedaes qu’apurre’l documentu presentáu pol Gobiernu d’Asturies ye que’l protocolu “va estender el so ámbitu d’aplicación a tola comunidá”, una midida carente de conteníu mientres nun haiga midíes oficiales nin se consideren los datos de les estaciones público-privaes, que son la mayoría ya inclúin dalgunes que refundien datos bien negativos; ye’l casu de la estacion del polígonu de Arobias, n’Avilés,  la que peores datos tien de tola Península para les PM10.

La segunda novedá qu’incorpora ye’l cambéu de llende de les partícules inferiores a 10 micres (PM10) pa l’activación del protocolu nel so nivel preventivu, que baxa de 45 µg/m³ a 40 µg/m³. El protocolu va ponese en marcha en nivel preventivu cuando n’una mesma estación se superen mientres trés díes consecutivos concentraciones de partícules de 40 microgramos per metro cúbicu (40 µg/m3), frente a los 45 µg/m3 actuales. Sicasí, nun se rebaxa nin los 3 díes, nin el restu de contaminantes nin nos estragales d’información y alerta pa les Pm10.

El nuevu documentu incorpora dos nuevos contaminantes, el diósidu d’azufre (GUO2) y l’ozonu (O3), sicasí, resalvó’l bencenu, un canceríxenu que supon un grave problema de salú pública pola so presencia nes coqueríes d’Uviéu, Xixón y Llangréu. 

En resume, afirmen “esta actualización allóñanos de los valores encamentaos pola OMS non como seguros, sinón como elementales para protexer a la población d’una evidente contaminación nel aire respirable. Como vecinos esiximos a les nueses instituciones una responsabilidá cola población y con les nueses redolaes, asina comu’l cumplimientu rigorosu de les midíes necesaries p’algamar los oxetivos de la transición ecolóxica, la descarbonización y el cambéu climáticu”.

Alberto Rodríguez

This work is licensed under a Creative Commons Attribution 4.0 International License.