La Ca Conceyu Xixón faise ecu de los -perescasos- nicios del pasu romanu pela ciudá y programa visites guiaes con autobuses llanzadera a los restos Romanos de Veranes
Pasao mañana pondránse a la venta les reserves pal Arqueobús y l’autobús llanzadera a Veranes, dos actividaes que van tar actives esti branu p’acercar a ciudadanos y turistes a dos de los museos arqueolóxicos de Xixón: el Parque Arqueolóxicu-Natural de la Campa Torres y la Villa Romana de Veranes. Les reserves puen realizase en www.reservagijon.es o nes oficines de turismu Infoxixón.
Son dos iniciatives que formen parte del programa Branu a la Romana, entamáu pola Fundación Municipal de Cultura cola collaboración de Visita Xixón, que tien como envís espardir la cultura astur-romana y promocionar el patrimoniu arqueolóxicu de la ciudá.
De magar el mes de xunu hasta setiembre ta prevista la organización d’una serie de tresllaos a la Villa Romana de Veranes pa facilitar la visita. En xunu, esti tresporte va funcionar les fines de selmana: sábados pela tarde y domingos pela mañana. Nos meses de xunetu y agostu, l’autobús va realizar dos tresllaos a la selmana: les tardes del xueves y les mañanes del vienres.
L’Arqueobús va empezar a funcionar el 13 de xunetu y tendrá salides tolos sábados y domingos hasta’l 1 de setiembre. Ye un itinerariu arqueolóxicu dramatizáu nel que personaxes teatralizaos realicen un percorríu al pasáu de Xixón visitando’l castru de la Campa Torres y la Villa Romana de Veranes. Pidíu tolos años por xixoneses y visitantes, anguaño va volver a duplicar la so actividá na fin de selmana. L’actividá cuerre a cargu de la Compañía Voz Gesto y Birlibirloque.
ARQUEOBÚS: Itinerariu arqueolóxicu dramatizáu
- Del 13 de xunetu al 1 de setiembre: sábados y domingos
- Horariu: de 16:30 a 19:30 h
- Preciu: 5 €. Menores de 16 años de baldre
- Información ya inscripción: www.reservagijon.es
- Puntu d’alcuentru: C/ Rodríguez Sampedro, Fomentín (a 50 m de les Lletrones)
AUTOBÚS LLANZADERA A VERANES
- Xunu: sábados, de 17:00 a 19:30 h; domingos, de 11:30 a 14:00 h
- Xunetu y agostu: xueves, de 17:00 a 19:30 h; vienres, de 11:30 a 14:00 h
- Preciu: 3 €. Menores de 16 años de baldre
- Información ya inscripción: www.reservagijon.es
- Salida: C/ Rodríguez Sampedro, Fomentín (a 50 m de les Lletrones)
Susana Sela
This work is licensed under a Creative Commons Attribution 4.0 International License.
