Aparte del dañu pal suelu y la biodiversidá que, de por si, implica’l cultivu d’ocalitos y de la so relevancia como factor de riesgu de quema, la crecedera del plantíu d’ocalitos en suelos agrícoles ta xenerando una perda sustancial de terrenes cultivables al llargu plazu, yá que  non solo ocupa esi suelu anguaño sinón que, una vegada que’l cultivu forestal dexe de ser rentable, la tierra va tar escosada pa otros usos.

Llantaos fuera del tarrén marcáu pa ello y superando con muncho la superficie permitio d’ocalitales n’Asturies, el llantíu d’ocalitos más reciente de Cabranes tendrá de ser baltáu. Sicasí, pese a reconocer la so illegalidá, la Conseyería de Mediu Rural y Política Agraria nun anunció entá les midíes que cuenta tomar pa revertir na midía lo posible’l dañu causáu por estos ocalitos, entamando por baltalos.

La Coordinadora Ecoloxista d’Asturies denuncia que’l gobiernu del PSOE vien venciendo a les presiones exercíes pola multinacional papelera ENCE y los maereros, ignorando’l marcu forestal y permitiendo dende va décades la colonización del suelu asturianu per parte del ocalitu, a sabiendes que yá va tiempu qu’esta especie superó la barrera de les 61.838 hectárees de superficie fita como llende pol Plan Forestal d’Asturies pal añu 2060. 

L’ocalitu aceda’l suelu sobro’l que se sofita. El suelu asturianu yá tien de por sí un pH baxu de resultes del altu réxime d’agües, lo cual agrávase entá más nel occidente’l país, onde los suelos son silicicos, lo que xunío a la gran cantidá de nutrientes que precisa estrayer pola sos rápida crecedera, al tratamientu forestal que s’aplica a los plantíos (yerbicíes, baltes a matarrasa cada 12 años, etc.) y al so altu consumu d’agua fae poco recomendable’l so plantíu. Amás, al ser un gran monocultivu de miles y miles d’hectárees, ensin fragmentación de dengún tipu, provoca que la rica fauna asturiana antaño ellí esistente se viére incapacitada p’afaese al nuevu hábitat. Lo mesmo puede dicise de les especies vexetales que foron progresivamente sumiendo énte la voracidad del ocalital. Tou ello ensin escaecer la inflamabilidá de la especie.

Ye responsabilidá del Gobiernu d’Asturies controlar los plantíos illegales, sancionar a quien tán llantando ocalitos ensin autorización y supervisar que se retiren tolos llantaos illegalmente, como ye’l casu llegalmente reconocíu de los de Cabranes. 

Nel Dos Santos

This work is licensed under a Creative Commons Attribution 4.0 International License.