Cinco llagares presentaron los sos productos nesta xornada, que tien l’envís de siguir cola promoción d’esti productu gourmet, ellaboráu con mazana 100% asturiana y con baxa gradación alcoólica.
El Conseyu Regulador de la Denominación d’Orixe Protexida Sidra d’Asturies celebró ayeri nel Parador Nacional de Turismu de Villanueva de Cangues el so segundu salón-esposición de les Sidres Naturales d’Espolleta, nel que presentaron la collecha d’esti añu d’esa variedá sidrera
Más de 150 asistentes al eventu, al que solo podía entráse previa invitación, pudieron tastiar les sidres de los cinco llagares que llevaron el so productu al salón: Viuda de Angelón, cola so DOP esplumosa Prau Monga, Sidra Fran, con Ramos del Valle, Emilio Martínez, cola sidra esplumoso del mesmu nome, el Llagar de Trabanco, con Poma Aurea y Sidra El Gaitero, que presentó trés sidres con distintu grau de dolzor: El Gaitero Etiqueta Negra, Valle Ballina y Fernández y Pomarina. Acompañando la sidra sirvióse una amplia escoyeta d’ ‘Alimentos del Paraísu’, na que nun faltaron abondes variedaes de quesos y embutíos asgaya de peralta calidá.
El director del Parador, Ignacio Bosch foi l’encargáu de presentar l’actu oficial, nel que tamién intervinieron la conceyala cangüesa, Blanca Bueno, Victor Ramos -presidente del Conseyu Regulador de la DOP Sidra d’Asturies- y el so xerente, Daniel Ruiz, asina comu la directora xeneral de Desendolcu Rural y Agroalimentación, Begoña López, que destacó la importancia d’apostar polo nueso y consumir productos asturianos nel díi ente díi, afalando a los asistentes a consumir productos asturianos.
Pel salón tamién pasaron hosteleros asgaya, collecheros de mazana, los alcaldes de Cabrales, José Sánchez y Colunga, José Ángel Toyos ya’l conceyal d’esportes de Cangues, Agustín García. Los asistentes destacaron l’aciertu de llevar a allugamientos alloñaos de les grandes urbes del centru d’ Asturies esti tipu d’eventos, siendo escoyíu esti conceyu del oriente asturianu pola so importancia turística y hostelera.
Alberto Rodríguez
This work is licensed under a Creative Commons Attribution 4.0 International License.
