La multinacional papelera Navigator tresllada a Asturies y Galicia el llantíu d’ocalitales pa surtir les sos cinco fábriques, de magar la prohibición portuguesa de llantar más ocalitos d’equí al 2030
La superficie arbolao d’Asturies ye de pocu más de 300.000 hectarees, de les que más de 70.000 son ocalitales, sobrepasándose va tiempu les 61.838 hectárees de superficie afitaes como llende pal añu 2060 nel pol Plan Forestal d’Asturies, ensin qu’ello toviere consecuencies pa los responsables. Una mancha ocalital ocupa ya un descomanáu parche continuu de 35.000 hectaries, desplazando la biesca autóctono con una perda de más de 18.000 hectarees de magar l’añu 2001.
La papelera ENCE y el so poder de negociación col gobiernu d’Asturies ta na base d’esa permisividá a la hora llantar ocalitos, pesi a ser de sobra conocios los perxuicios qu’esti árbol tien na nuesa tierra. Agora la multinacional lusa Navigator, líder n’Europa na producción de folios, ta alquilando montes n’Asturies y Galicia pa llantar ocalitos pa la so producción. En concretu, tien ya baxo la so xestión más de mil hectárees y afirmen qu’esta actividá “va medrar nun futuru”.
La empresa portuguesa cuenta con cinco fábriques papeleres, factura cerca de 2.000 millones d’euros al añu y vende pasta y papel en 130 países de los cinco continentes, siendo’l mayor productor d’ocalito de la Península Ibérica. Les restricciones al ocalito impuestes en Portugal de magar la traxedia de Pedrógão Grande, na que 64 persones perdieron la vida nel incendiu d’un ocalital, torguen la espansión de Navigator, ya que tienen prohibio llantar más ocalitos nel país vecín fasta l’añu 2030, polo que la multinacional lusa entama a xestionar directamente montes asturianos en réximen d’alquiler a llargu plazu. Nun se sabe la superficie xestionada fasta agora porque la empresa refuga concretar la superficie de monte alquilado que ya xestiona Navigator n’Asturias nin les condiciones qu’ufre a los propietarios.
Les consecuencies de les qu’agora Portugal quier llibrase van más allá del riesgu d’incendiu: el desaniciu de la viesca autóctono, la destrución d’ecosistemes, los animales desplazaos ya’l suelu agostáu, malu de recuperar una bones el cultivu s’abandona por dexar de ser rentable pola cantidá de nutrientes que precisa pal so rápidu xorrecimientu, l’altu consumu d’agua precisu pa producir en pocu tiempu grandes cantidaes de biomasa, l’usu de yerbicides ya les tales a matarrasa ca doce años, que prevoquen graves procesos d’erosión ya esgotamientu del suelu asturianu y un llargu etc. que l’aliministración asturiana s’emperra n’obviar fasta que seya ya demasiao sero.
Nel Dos Santos
This work is licensed under a Creative Commons Attribution 4.0 International License.
