Pescadores asturianos consideren llaceriosos los resultaos de la temporada 2024 de xarda y alerten de qu’esti pexe cuasique desapaeció de les nueses agües
Los malos resultaos espárdense per tol Cantábricu, hasta’l puntu de que munchos armadores prefirieron esborriase de la campaña pa nun s’arriesgar y son munchos los esmolecios pol futuru del sector pesqueru “Algo pasa cola xarda porque ta casi desapaecio de la mar”, afiten.
Los datos estadísticos son los piores recoyios. De 3.189 tonelaes rulaes n’Avilés nel 2022, un añu malu, por5,16 millones d’euros, pasáronse a 1.873 nel 2023 y a namás 1.475 nel mesmu periodu de 2024, repartiéndose namás 2,25 millones pente los armadores que venden nesta rula.
Hai que puntualizar que les coses nun van tan mal pente los que pesquen con cercu y arrastre, que incluso tan faciéndose col cupu de los que desisten d’ello a anzuelu.
Una planificación a llargu plazu, con criterios científicos que regule non solo cupos, sinón descansos y los artes de pesca utilizables, asina como una fuerte xixilancia del nivel de contaminación de les agües que podría desplicar la desapaición d’esta especie son imprescindibles non solo pa garantizar la presencia de xarda nos años venideros y dar una continuidá al llabor de los pescaores, sinón pa conocer la situación del nuesu mar y prevenir desanicios d’otres especies.
This work is licensed under a Creative Commons Attribution 4.0 International License.
