La peña Uvieista resalta que’l fasta entos entrenador nun diera enxamás problemes en clú, pero que “los fechos ocurrios son de suficiente gravedá” y piden esculpies a “toles persones involucraes”
El miembru de la “Hermandad de Defensores de Oviedo” entrenaba, fasta agora, a un grupu de rapacinos na Peña Uvieista Beryma, del barriu La Monxina, n’Uviéu. Tres del so comportamientu, con ataques y menacies a los participantes n’acampada protesta de los universitarios contra’l xenocidiu palestín, la peña decidió que la so presencia nel Campu Fúbol Matalablima ya nun yera procedente, muncho menos el so tratu cola xente mozo a la qu’entrenaba.
Esti nun yera’l primer altercáu de corte facista que Nacho Moreno protagonizaba, siendo bien conocíu polos grupos antifacistes colos que tuvo ya dellos alcontronazos, seique paez ser que’l so comportamientu nel ámbetu fubolísticu nun diere problemes a la so peña. Foi gracies a la grabación fecha de la so intrusión por un de los participantes n’acampada lo que permitio visibilizar el so comportamientu, faciéndolu viral y llevando al Beryma a tomar la decisión del so cese “en tolos estamentos del clú”.
La rápida reacción de la Peña foi perbién acoyía en redes pol so exemplu d’actuación al tener tan nidio qu’esta triba de comportamientos nun pueden quedar impunes.
Nel Dos Santos
This work is licensed under a Creative Commons Attribution 4.0 International License.
