El xacimientu foi removíu ensin siguimientu arqueolóxicu por unes obres que nun tovieron en cuenta l’ámbetu de protección del mesmu
La necrópolis tardorromana de Paredes, allugada nel Monte les Muries, en Siero, llocalizóse nel añu 1997 durante la costrucción del centru comercial “Parque Principado”, na finca “La Granxa”, siendo datada ente finales del siglu IV y entamos del V. A corta distancia identificóse la villa Monte les Muries, núcleu de población al que taría venceyada la necrópolis.
Nesi momentu, el xacimientu arqueolóxicu de Paredes, catalógose con ámbetu de protección del so entornu na carta arqueolóxica de Siero, col nome de Monte les Muries, figura que, en teoría, torga que se realicen nel so alrodiu obres ensin un estrictu control arqueolóxicu.
Sicasí, les obres desendolcaes a lo cabero del 2023 pol conceyu Siero dientro’l so perímetru removieron tierres ensin denguna triba de control. El resultáu foi el desplazamientu y mezcla d’abondos ñicios arqueolóxicos, comu güesos humanos, cerámica romana y medieval o restos de teya, pente otros, que aunque pueden seguir rescatándose ya tan desaniciaos del so contestu orixinal, de manera qu’agora ye imposible catalogalos y datalos correchamente, restándoyos tol so valir arqueolóxicu, una perda padremuñal importante ya irrecuperable.
Por ello, dende Andecha Astur vienen de presentar sendos escritos al Principado y a la Ca Conceyu de Siero, solicitando que s’abra una investigación y se depuren responsabilidaes ante la importante estroza “Les obres nel perímetru del xacimientu foron illegales, asina que desiximos al Conceyu de Siero qu’asuma la so responsabilidá y al Principado qu’anicie una investigación sobre les obres y destrucciones consecuentes autorizaes nel espaciu arqueolóxicu protexíu”.
Soliciten tamién que s’amplie l’ámbetu de protección actual a la zona conocida como de “Los Molinos”, onde los arqueólogos apunten dende va tiempu a la esistencia de ñicios venceyaos a la villa de Paredes.
Llucía F. Marqués
This work is licensed under a Creative Commons Attribution 4.0 International License.
