El xueves 6 el Cientru Municipal Xixón Sur, en Pumarín, acoyerá la presentación oficial de la coallición Agora Repúbliques na que participa Andecha Astur, y que concurre a les prósimes elleiciones estatales del 9 X.
L’actu de presentación d’ Agora Repúbliques, que nos anteriores comicios europeos algamó 1.257.484 votos y a la que les caberes encuestes del CIS dan cuatro escaños nel Parlamentu Européu, tendrá llugar a les 19 hores, y nel mesmu intervendrán Jon Iñarritu, diputáu d’EHBildu y Llucía Fernández, d’Andecha Astur.
La coallición Agora Repúbliques, cola qu’Andecha Astur collabora nuevamente nestes elleiciones, ta costituyía por fuercies soberanistes de tol estáu, de manera que la participación nella permite a toles naciones ensin estáu representaes cuntar con un accesu direutu al parllamentu européu, onde se deciden cuestiones tan importantes comu la política social o agraria, “saltándose” el pasu del estáu español.
Dende Andecha Astur tienen perclaro que los partios españoles, seyan de dreches o d’izquierdes, nun van priorizar enxamás los intereses de los asturianos, polo que consideren qu’Agora Repúbliques ye “la única opción que permite una representación direuta de los intereses d’Asturies”.
Foi precisamente la collaboración pente Agora Repúbliques y Andecha Astur lo que permitió llevar al Parllamentu Européu cuestiones tan importantes comu los fraudes d’El Musel y de los fondos mineros, la represión llingüística, la desindustrialización d’Asturies o l’escesu de contaminación ambiental, asina comu dellos conflictos llaborales, comu los d’Arcelor y EBHI.
Esti xueves, nel Cientru Municipal del Polígonu Pumarín – Xixón Sur, na Cai Ramón Areces 7 , a les 19 hores, Llucía Fernández por Andecha Astur y Jon Iñarritu por ehBildu desplicarán en Xixón el programa d’esta coallición y comu va defender a Asturies n’Europa, retrucando a les duldes que pudieren surdir.
Nel Dos Santos
This work is licensed under a Creative Commons Attribution 4.0 International License.
