Esiste solución por métodos biolóxicos pa les plagues que carecen les castañales asturianes, pero prefieren arrasar los castañeos
D’unos años p’acá tan baltándose castañales ensin xacíu, a matarasa, nos montes públicos del conceyu de Casu, col consiguiente impautu pal suelu, paisaxe, flora y fauna d’estes biesques. La esculpia ye sanear la plaga de fongos.
N’Asturies, acordies al 4 inventariu forestal, hai alrodiu de 80.000 hectárees de castañales, afeutaes por fongos y plagues cuasi dafechu y abandonaes al debalu. Dos son los grandes enemigos que tan diezmando los castañeos asturianos, el fongu Cryphonectria parasitica y la viesporina de la castañal, Dryocosmus kuriphilus, la plaga de mayor gravedá nes castañales a nivel mundia, presente n’Asturies de magar l’añu 2014.
Los dos puen combatise con métodos de control biolóxicu, la primera con una consistente na inoculación de cepes hipovirulentes enos árboles que presenten cepes virulentes causantes de la enfermedad -sistema que ta utilizándose n’otres partes d’Europa con ésitu- y la segunda mediante sueltes del parasitoide Torymus sinensis, midía que s’aplicó mui insuficientemente n’Asturies.
Frente a estes formes de control inocues pal equillibriu mediu ambiental, la política del Principado, en xeneral, y del conceyu Casu, en concretu, ye’l baltu indiscrimináu de cientos de castañales, eliminando tolos árboles d’edá maura de grandes zones.
Casu ta dientro’l Parque Natural de Redes, Reserva de la Biosfera y que pertenez a la rede ecolóxica Europea Natura, incluyendo zones especiales de proteición y caltenimientu ZEC.
Esti tipu d’actuaciones silvícoles, llueñe de favorecer la biodiversidá, producen cuantiosos ingresos al Conceyu pola vienta de la madera, según denuncien los ecoloxistes, siempres a la mesma empresa.
El dineru llograo de la venta de maera nun se reinvierte en trabayos forestales destinaos a la repoblación y clasificación de los biltos de los castañales valtaos, dexando que bilten enfermos y sanos entemecíos y abandonando nel monte la madera non aprofitable infectao, lo que difícilmente va finar cola plaga d’hongos, perpetuando asina la esculpia pa siguir baltiando.
Esti criteriu economicista, amás, ye cortoplacista ya erroneu, ya qu’hai estudios que caltienen que’l cultivu de les castañales ye, a mediu plazu, 6 vegaes más rentable que l’ocalitu.
Poro, dende la Coordinadora Ecoloxista d’Asturies tornaron a solicitar tantu al Conceyu de Casu como al “Principado”, que consiente estes baltes masives, que se faiga una revisión del plan téunicu de xestión de la castañal, teniendo en cuenta l’estudiu biolóxicu del Serida y s’apare de baltar les poques castañales que queden.
Llucía F. Marqués
This work is licensed under a Creative Commons Attribution 4.0 International License.
