El grupu d’ultradrecha españolista denuncia en Villaviciosa el cumplimientu de la normativa municipal al utilizar cartelería n’Asturianu
La conceyal maliaya Marta Sánchez vien de denunciar a la Casa Conceyu de Villaviciosa por tener la rotulación y cartelería n’asturianu, tal comu recueyen les ordenances municipales al respeutu. Al so entender, esa rotulación vulnera los sos drechos y xenera-y confusión (prubina). Pa ella esto, asina comu la esistencia mesma de documentos redactaos n’asturianu, va contra la llei, ya que lo considera “actos que reconocen de factu la oficialidá de la llingua asturiana” y claro, eso de reconocer de factu los drechos de los seres humanos nun va col so partíu.
Nun ye la primer vegada que trata d’imponer pola fuercia l’español como idioma esclusivu nel conceyu, pidiendo que se sustituya non solo la cartelería, sinón incluso que se tornen al español y se destruyan les versiones n’asturianu de publicaciones y escritos, p’asegurase de que nun queden resclavos del pasu del asturianu pel ayuntamientu. Sicasí, esta ye la primer vuelta qu’interpón una denuncia al traviés del xulgau.
Llucía F Marqués
This work is licensed under a Creative Commons Attribution 4.0 International License.
