Delles persones advierten de la desapaición de los sos votos nel recuentu de votos de los caberos comicios
Les pasaes elleiciones europees trescurrieron con normalidá. Ello ye, con colexos onde faltaben papeletes de dellos partios, cabines ensin toles papeletes, policies con armes dientro del cientru elleutoral a los qu’hebio que remembrar la llei que yos lo prohibe y un exércitu de voluntarios iguando toes eses cuestiones colexu a colexu.
La sospresa saltó cuando se dieron a conocer los resultaos y dellos votantes, en concreto de la formación Agora Repúbliques, se decataron de que los sos votos nun apaecíen nel recuentu. Ello ye especialmente flagrante en casos, comu el del colexu de Vega, nel que cuatro persones votaron na mesma mesa y nella apaecen recoyíos esautamente cero votos a la formación. Nun son los únicos y Andecha Astur, representante d’Agora Repúbliques n’Asturies, ya ta recoyendo datos de tolos votantes que denuncien esa situación, polo que conviden a tolos asturianos que na midía de lo posible compreben si los sos votos apaecen recoyíos nos sos respeutivos colexos.
Les reclamaciones son complicaes, una bones la llei, lloñe de desixir que les papeletes se guarden precintaes pal casu de que surdan complicaciones, obliga a destruyir darráu les prebes de lo votao. Sicasí, Agora Repúbliques ta estudiando les midies a tomar.
Llucía F. Marqués
This work is licensed under a Creative Commons Attribution 4.0 International License.
