Les comunicaciones ineficientes son un de los puntos clave a la de valorar los motivos de la despoblación de les zones rurales
El cambéu de la llínea L-3 ente’l cascu urbanu y Valdefarrucos anunciada’l miércoles pol Conceyu de Mieres retaya hasta nueve servicios al día al pobláu mineru de Bustiello, que ven como se-yos retayen hasta nueve servicios al día peles mañanes.
El nuevu itinerariu va afeutar a nueve servicios, toos pela mañana, ente les 6.30 hores y les 14.30 hores, nos autobuses que salen a les “y media”, que van acabar la so linea en Santa Cruz, dexando de parar en Bustiello y Valdefarrucos.
Esto afeuta a una población que non solo tien dificultaes de tresporte públicu, sinón que tien de movese un mínimu de cuatro kilómetros pa, por casu, realizar les compres básiques, lo que fai más esmolecedora la perda de les paraes.
“Nun vamos quedar paraos cuando nun entendemos como pueden esaniciase estos autobuses a una población que tien los servicios mínimos, como les tiendes d’alimentación, a cuatro kilómetros en dambos sentíos“, apuntaron dende’l colectivu vecinal de Bustiello, quien anunciaron movilizaciones pa reclamar que se-yos devuelva un serviciu que consideren necesariu ya en tou casu, non insuficiente.
Alberto Rodríguez
This work is licensed under a Creative Commons Attribution 4.0 International License.
